“Prishtina Open 2025” me konkurrencë të fortë në të gjitha kategoritë

“Prishtina Open 2025” pritet të jetë një nga ngjarjet më madhështore sportive të vitit, duke mbledhur mbi 300 pingpongistë nga më shumë se 25 shtete të ndryshme.

Ky turne ndërkombëtar i pingpongut, i cili po konsolidohet si një traditë e përvitshme prestigjioze, ka fituar vëmendjen e sportistëve dhe tifozëve në mbarë botën.

Edhe këtë vit, gara do të zhvillohet në Pallatin e Rinisë dhe Sportit në Prishtinë, më 20, 21 dhe 22 qershor 2025, dhe do të përfshijë kategori të ndryshme: nga juniorët U11 e deri te veteranët mbi 70 vjeç, duke krijuar mundësi për të gjitha moshat të garojnë në një skenë ndërkombëtare.

Me kaq shumë pjesëmarrës, pritet një konkurrencë e fortë dhe përplot emocione.

Sportistë nga kontinente të ndryshme do të sjellin në Prishtinë një mozaik stilesh loje dhe kulturash, duke e bërë këtë turne një ngjarje të rrallë dhe shumëngjyrëshe në kalendarin e sportit ndërkombëtar të pingpongut.

Përveç garave, “Prishtina Open 2025” do të sjellë befasi për publikun, duke përfshirë edhe një super shpërblim – një iPhone 16 për një nga tifozët fatlumë.

Kjo e bën turneun më shumë sesa një aktivitet sportiv – një festë të miqësisë, pasionit dhe solidaritetit ndërkombëtar.

Organizatorët kanë njoftuar se shorti i ndeshjeve është publikuar të hënën, ku lojtarët kanë mësuar kundërshtarët e tyre.

Me një organizim profesional, një numër rekord pjesëmarrësish, dhe një atmosferë të zjarrtë, “Prishtina Open 2025” premton të jetë një ngjarje që nuk duhet humbur.

Të gjithë dashamirët e sportit ftohen të jenë pjesë e këtij spektakli, ndërsa Prishtina shndërrohet në kryeqendrën e pingpongut ndërkombëtar.