Italia humb pikë në renditje të UEFA-s, mund ta humbë vendin e pestë në Ligën e Kampionëve

Rezultatet zhgënjyese në ndeshjet e para të play-offit këtë javë kanë bërë që Italia të rrëshqasë pas Spanjës në garën për një vend të pestë në Ligën e Kampionëve për sezonin 2025-26.

Këto ishin vetëm ndeshjet e para të fazës play-off dhe gjithçka mund të ndryshojë javën e ardhshme me sfidat e kthimit.

Atalanta u mposht nga Club Brugge dhe Milani humbi 1-0 ndaj Feyenoord në Ligën e Kampionëve, ndërsa vetëm Juventusi arriti një fitore, duke mundur PSV Eindhoven 2-1.

Në Europa League, Roma barazoi 1-1 në transfertë ndaj FC Porto.

Me ekipet spanjolle që po bëjnë paraqitje të shkëlqyera në play-off, kjo ka ndikuar ndjeshëm në renditjen e UEFA-s për sezonin 2024-25, që përcakton shtetet që do të fitojnë një vend të pestë në Champions për edicionin e ardhshëm.

Anglia ka kryesuar për shumicën e sezonit dhe vazhdon të mbajë vendin e parë, por Spanja tashmë ka kaluar Italinë në vendin e dytë.

Gjermania dhe Portugalia janë shumë pranë njëra-tjetrës në vendin e katërt dhe të pestë, ndërsa Franca renditet e gjashta.

Renditja e UEFA-s për sezonin 2024-25:

Anglia – 20.892

Spanja – 18.035

Italia – 17.687

Gjermania – 15.421

Portugalia – 15.350

Franca – 14.214.