Ahmeti ambasadorit të Italisë: Ndërhyrja ndaj gjuhës shqipe dhe Marrëveshjes së Ohrit rëndon situatën

Kryetari i Bashkimit Demokratik për Integrim (BDI), Ali Ahmeti, sot në Tetovë, priti ambasadorin e Italisë në vendin tonë Andrea Silvestri

Ahmeti dhe ambasadori Silvestri bashkëbiseduan për marrëveshjen e Ohrit, zgjedhjet, reformat dhe sundimin e ligjit si dhe integrimin evropian.

 Ahmeti theksoi se, BDI-ja dhe Fronti Evropian ngadhënjyen në zgjedhjet presidenciale dhe parlamentare, por ky vullnet i qytetarëve u injorua nga mandatari padrejtësisht.

“Marrëveshja e Ohrit është garantues i paqes, sigurisë, stabilitetit dhe i marrëdhënieve ndëretnike në vend. Cenimi i legjitimitetit zgjedhor, ndërhyrja tendencioze ndaj gjuhës shqipe, etnisë dhe përfaqësimit të drejtë dhe adekuat ndikon drejtpërdrejtë në marrëdhëniet ndëretnike dhe stabilitetin e vendit. Marrëveshja e Ohrit është e garantuar nga BE dhe SHBA, ndërsa pjesë e zbatimit kanë qenë edhe NATO dhe OSBE. Edhe largimi nga perspektiva evropiane po tensionon qytetarët dhe po rëndon situatën politike në vend”, thuhet në njoftimin e BDI-së.

Dialogu politik nëpërmjet të respektimit të legjitimitetit zgjedhor të përfaqësuesve legjitim të komuniteteve etnike duhet të rivendoset me zgjedhjet e përbashkëta parlamentare dhe lokale në tetor të vitit 2025.