Publikimi i përmbajtjeve nga doracaku për edukim seksual, Lista për Familje kërkon dorëheqjen e Nagavcit

Koalicioni Lista për Familjen ka mbajtur konferencë për media, në të cilën është kërkuar dorëheqja e ministres Arbërie Nagavci, pas publikimit të përmbajtjeve nga Doracaku për Mësimdhënës për Edukim Gjithëpërfshirës Seksual.

Në reagimin e tyre thuhet se Ministria e Arsimit, Shkencës, Teknologjisë dhe Inovacionit e ka promovuar këtë doracak më 4 qershor 2021.

Tutje, theksohet se po ashtu në tetor të vitit 2023 MASHTI ka organizuar “Javën e promovimit të shëndetit në shkolla”, ku është folur për “Edukimi seksual gjithëpërfshirës në shkolla”.

Anëtarët e Listës për Familjen – deputeti Eman Rrahmani, avokati Asdren Bytyqi dhe gazetarja Fatijona Bajraj kanë thënë se ministrja Nagavci mban përgjegjësi të plotë për të gjitha këto.

“Ne i kemi identifikuar dhe analizuar këta doracakë, përmbajtja e të cilëve është antiligjore” – ka thënë ndër të tjera avokati Bytyqi.

Sipas tij, ato që prezantohen në këtë dokument bien ndesh me mënyrën se si parashihet dhe rregullohet familja sipas dispozitave ligjore në fuqi.

Deputeti Eman Rrahmani, nga ana tjetër, tha që të gjitha këto janë të papranueshme, duke shtuar se “për këtë kërkojmë dorëheqjen e menjëhershme të ministres Nagavci, meqenëse dëmi të cilin e ka shkaktuar te fëmijët dhe familjet është i pariparueshëm”.

Gjatë konferencës, nëpërmjet një projektori, u shfaqën edhe pjesë nga përmbajtja e doracakut.