Ilirik Musliu pritet t’i hyjë garës për deputet

Ish-drejtori i Shërbimeve Publike në Komunën e Prishtinës, Ilirik Musliu, është një nga kandidatët më të përfolur nga Prishtina për t’u bërë pjesë e garës së ardhme në zgjedhjet parlamentare nga radhët e Partisë Demokratike të Kosovës (PDK).

Ndonëse zyrtarisht PDK-ja ende nuk ka prezantuar emrat e deputetëve, “Zëri” ka mësuar se Musliu, i cili njihet si një ish-drejtor shumë aktiv i kryeqytetit, do t’i hyjë garës për deputet.

Me një histori të gjatë të angazhimit dhe performancës së tij si një nga drejtorët më aktivë në Komunën e Prishtinës, Musliu ka fituar respekt dhe besim si një profesionist që është përkushtuar për përmirësimin e infrastrukturës dhe ofrimin e shërbimeve publike për qytetarët e kryeqytetit.

Në rolin e tij në Shërbimet Publike, ai është shquar për iniciativat e ndërmarra për përmirësimin e infrastrukturës publike, përfshirë pastrimin e qytetit, mirëmbajtjen e rrugëve dhe hapësirave të gjelbra, si dhe për modernizimin e shërbimeve komunale. Aktiviteti i tij intensiv në këtë sektor ka bërë që ai të përmendet shpesh në media dhe të vlerësohet nga qytetarët për dedikimin e tij.

Duke qenë i njohur për punën dhe përkushtimin e tij, kandidatura e Musliut për deputet pritet të tërheqë mbështetje të konsiderueshme, veçanërisht nga qytetarët e Prishtinës që kanë parë rezultatet e angazhimit të tij të vazhdueshëm. /Zëri