“Do të fillojmë me protesta e greva”, Sindikata e RTK-së kërkon rritje të buxhetit

Sindikata e Punëtorëve të RTK-së ka kërkuar nga deputetët ta shtojnë buxhetin për televizionin publik.

Nëse kjo nuk ndodh, ata kanë paralajmëruar protesta.

Reagimi i plotë, pa ndërhyrje:

Sindikata e Punëtorëve e RTK-së njofton të gjithë deputetët e Kuvendit të Kosovës se RTK-ja është në gjendje të rëndë financiare.

Sindikata për çdo vit e bën një kërkesë të tillë për kthimin e buxhetit sipas ligjit aktual deri në një zgjidhje tjetër kur të miratohet ligji i ri i RTK-së. Ju bëjmë thirrje të na e rrisni buxhetin, ndryshe RTK-ja e ka të pamundur mbijetesën.

Sindikata do të presë deri në ditën kur të miratohet buxheti në nivel nacional, nëse kërkesat tona nuk plotësohen, do të fillojmë me protesta e greva deri në realizimin e kërkesave tona që burojnë nga ligjet në fuqi.

Ju rikujtojmë se përveç mungesës së pronës, ligjit e financimit të pavarur të RTK-së, në mediumin e vetëm publik nuk ka ndodh rritje të pagave nga viti 2007.

Nuk kemi avancim të kontratës kolektive, nuk kemi sigurim shëndetësor, kemi inflacion të lartë kosto jetese të pa përballueshme.

Kërkojmë nga të gjithë kolegët në RTK që të na mbështesin në kërkesat tona, sepse janë për të mirën e RTK-së dhe gjithë punonjësve. Ditëve në vijim do të ndërmarrim edhe nisma ligjore për këtë çështje.

Pritjes sonë të gjatë i ka ardhur fundi!