Arrestohet një i dyshuar në Rahovec për përdorim të paligjshëm armësh

Një person është arrestuar për veprën “Posedim i paligjshëm dhe përdorim të armës”, e cila ngjarje ka ndodhur të dielën rreth orës 18:30 në fshatin Xërxë - Rahovec.

Sipas një njoftimi të Policisë, në vendin e ngjarjes janë gjetur dhe sekuestruar: arma e përdorur, katër gëzhoja, si dhe 46 copë fishekë, raporton Zeri.info.

“Më datën 27 tetor 2024, rreth orës 18 e 30, zyrtarët policorë në kuadër të Drejtorisë Rajonale të Policisë në Gjakovë kanë ndërmarrë një veprim të shpejtë dhe efikas për kapjen dhe ndalimin e një personi të dyshuar për posedim të paligjshëm dhe përdorim të armës, ngjarje kjo e ndodhur në fshatin Xërxë - Rahovec.

Një patrullë e trafikut rajonal, gjatë patrullimit të saj rutinë, ka vërejtur një të dyshuar mashkull të moshës madhore duke shtënë me armë zjarri. Pas identifikimit të vendndodhjes së të dyshuarit, patrulla policore ka reaguar menjëherë duke arritur të lokalizojë dhe të arrestoj të dyshuarin. Në vendin e ngjarjes, janë gjetur dhe sekuestruar arma e përdorur, katër gëzhoja, si dhe 46 copë fishekë”, thuhet në njoftimin e PK-së.

Po ashtu sipas njoftimit të PK-së, bëhet e ditur se me vendim të prokurorit kujdestar, i dyshuari është ndalur në mbajtje për 48 orë, si dhe është iniciuar rast “Mbajtja në pronësi, kontroll ose posedim të paautorizuar të armëve dhe përdorimi i armës ose mjetit të rrezikshëm”.

“Policia e Kosovës mbetet e përkushtuar në ruajtjen e sigurisë publike dhe në reagimin e shpejtë ndaj çdo situate që cenon rendin dhe qetësinë”, thuhet në njoftimin e Policisë. /Zëri