Vëllai dyshohet se theri për vdekje vëllain, krejt ç’dihet për ngjarjen tragjike në kryeqytet

Një rast i rëndë ka tronditur kryeqytetin të dielën mbrëma, ku një person dyshohet se u ther për vdekje nga vëllai tij, shkaku i një mosmarrëveshjeje.

Ngjarja ka ndodhur në rrugën “Tirana” në Prishtinë, rreth orës 20:30.

Motivet e rastit akoma nuk dihen, teksa tashmë ka nisur hetimi nga Policia në koordinim me prokurorin e Shtetit.

Me të marrë informatën Policia doli menjëherë në vendngjarje.

Zëdhënësi i Policisë, Daut Hoxha, bëri të ditur se nga informacionet fillestare kemi të bëjmë me një mosmarrëveshje mes dy personave, ku dyshohet se njëri ka goditur tjetrin me një mjet të mreshtë.

“Ekipi shëndetësor ka konstatuar se viktima nuk ka shenja jete”, tha Hoxha.

Ndërkaq personi që dyshohet se theri për vdekje vëllain, është duke u trajtuar në Qendrën Klinike Universitare të Kosovës (QKUK).

Drejtori i Emergjencës, Naser Syla, mbrëmë u shpreh se i njëjti është në gjendje stabile.

“Një i lënduar me armë të ftohtë është duke u trajtuar në QE, për momentin janë duke u kryer ekzaminimet e duhura, gjendje stabile është”, u shpreh Syla. /telegrafi