Vitia me thirrje për marrjen e vaksinave të gripit sezonal: I kemi siguruar 85 mijë doza

Ministri i Shëndetësisë, Arben Vitia përmes një postimi në rrjetin social Facebook ka bërë të ditur për sigurimin e 85,000 doza të vaksinave kundër gripit sezonal.

“Vaksinat kundër gripit sezonal kanë arritur në Kosovë dhe janë shpërndarë në të gjitha komunat, në përputhje me kërkesat e tyre. Më 17 shtator 2024, kemi siguruar 85,000 doza të vaksinave kundër gripit sezonal, të cilat janë të dedikuara për fëmijët mbi 6 muaj dhe për të rriturit”, ka shkruar Vitia.

Ai ka bërë thirrje për marrje të vaksinave, teksa ka treguar se vaksinimi ka nisur më 30 shtator.

“Ftojmë të gjithë qytetarët mbi moshën 65 vjeç, ata me sëmundje kronike, si dhe të gjithë personat që kanë rekomandim mjekësor, të vaksinohen. Parandalimi është gjithmonë më i mirë se mjekimi”, ka thënë ai.