Përvjetori i sulmit në Banjskë, etiketa me mesazhe provokuese në veri
Në fshatin Banjskë të Zveçanit një grup i armatosur serbësh sulmoi policinë e Kosovës më 24 shtator 2023, ku mbeti i vrarë polici Afrim Bunjaku.
E kur nesër shënohet përvjetori i kësaj ngjarjeje të rëndë terroriste, në veri kanë filluar të vendosen etiketa me mbishkrime të ndryshme.
Disa të tilla janë parë sot të vendosura kryesisht në shenjat e komunikacionit.
“Armata e Veriut” dhe “ Veriu i Çetnikëve” janë disa prej këtyre etiketave që janë hasur sot, shkruan Telegrafi.
Kujtojmë se Prokuroria Speciale ka ngritur aktakuzë ndaj 45 personave lidhur me sulmin e 24 shtatorit të vitit 2023, në mesin e tyre edhe Millan Radoiçiq.
Aktakuza i ngarkon shumicën e tyre për kryerje të terrorizmit dhe të veprave të rënda kundër rendit kushtetues dhe sigurisë së Republikës së Kosovës.