Maqedonci: Investuam mbi një milion euro në Akademi, 43 kadetë po i kryejnë studimet

Ministri i Mbrojtjes Ejup Maqedonci ka shkruar për Akademinë e Mbrojtjes, ku thotë së për të janë investuar mbi një milion euro.

Ai në një postim në “Facebook” tha se Akademia është ndërtuar mbi programe që do i ndihmojë kadetët të bëhen udhëheqës dhe t’i shërbejnë atdheut.

“Investuam mbi një milion euro në ndërtimin e objektit të Akademisë së Mbrojtjes, ashtu që menaxhmenti drejtues e akademik të ngrejë kapacitetet profesionale të Forcës së Sigurisë së Kosovës përmes shkollimit të kuadrove të reja të kadetëve në Qendrën për Studime Universitare dhe avancimin e oficerëve në Shkollën e Oficerëve. Qendra për Studime Universitare (QSU) e ndërtuar mbi katër shtylla apo programe kryesore: Programi Profesional; Programi i Udhëheqjes; Programi Akademik dhe Programi i Përgatitjes Fizike, ka për mision që të arsimojë, edukojë, trajnojë dhe inspirojë kadetët që të bëhen oficerë të cilët do të udhëheqin me shembull dhe që qëllim kryesor kanë shërbimin ndaj atdheut”, shkruan Maqedonci.

Ministri tha se në akademi janë duke i kryer studimet 43 kadetë, ku sipas tij po i marrin vlerat e rëndësishme si “besnikëria, detyra ndaj atdheut, respekti, nderi dhe guximi personal”.

“Janë dyzet e tre kadetë të cilët aktualisht po ndjekin studimet në këtë qendër, e të cilët deri në përfundim të studimeve do të kenë mishëruar në karakterin e tyre vlerat më të rëndësishme si besnikëria, detyra ndaj atdheut, respekti, nderi dhe guximi personal”, tha ai.

“Kadetët e diplomuar në Qendrën për Studime Universitare - Akademinë e Mbrojtjes janë liderët e së ardhmes. Të përgatitur në aspektin fizik e mendor janë të gatshëm për të udhëhequr çdo situatë në mënyrë efektive, pa marrë parasysh mjedisin ose skenarin e operacionit. FSK-ja, krenaria jonë!”, përfundoi ai.