Zyrtare: Lucas Vazquez rinovon kontratën me Real Madridin

Real Madridi ka njoftuar se Lucas Vazquez ka rinovuar kontratën e tij me klubin madrilen.

Lajmi është konfirmuar nga klubi përmes një komunikate zyrtare në platformën “X”, përcjell “Zëri”.

Lojtari me rinovimin e kontratës do të jetë pjesë e “Los Blancos” deri më 30 qershor 2025.

“Real Madrid C. F. dhe Lucas Vazquez kanë rënë dakord për një zgjatje të kontratës së lojtarit, duke e lidhur atë me klubin deri më 30 qershor 2025”, thuhet në komunikatën e klubit.

Vazquez mbërriti në Real Madrid në vitin 2007, në moshën 16-vjeçare, duke luajtur në nivelin e të rinjve nga U-17 deri në Castilla në 2014.

Në nëntë sezonet e tij me ekipin e parë, ai ka qenë pjesë e një prej periudhave më të suksesshme në historinë e klubit duke fituar 21 tituj: 5 Liga të Kampionëve, 4 Kupa të Botës për Klube, 3 Superkupa Evropiane, 4 tituj La Liga, 1 Copa del Rey dhe 4 Superkupa Spanjolle.

Vazquez ka bërë 349 paraqitje në ekipin e parë, duke shënuar 36 gola, dhe ai është gjithashtu një ndërkombëtar i Spanjës, me nëntë paraqitje në emër të tij. /Zëri