Maqedonci: Sinjalet për sulme shtrojnë nevojën për traktat të Paqes me Serbinë

Paralajmërimet e institucioneve shtetërore të Kosovës për sulme të reja në veri të vendit nga Serbia kanë shtruar nevojën për një traktat paqeje midis Kosovës dhe Serbisë.

Ministri i Mbrojtjes Ejup Maqendonci tha se një ide e tillë do të duhej të ishte pika kyçe në proces të dialogut në Bruksel.

“Një ndër kërkesat kyçe të kryeministrit të Kosovës që para se të hyhet në proces të dialogut dhe bisedime të bëhet një traktat i paqes, pra mos sulmimit mes dy vendeve dhe kjo do të duhej të shërbente si bazamenti i dialogut. Vlerësoj se kjo duhet të mbetet një ndër pikat që duhet të diskutohet para se të fillohet të vendoset për çështje të tjera në kuadër të dialogut”, tha Maqedonci për rtv21.

Në qershor të vitit 2021, kryeministri Albin Kurti paraqiti katër propozime për vazhdimin e bisedimeve me Serbinë përfshirë edhe idenë e një traktati paqeje përmes të cilës palët do të zotoheshin se nuk do ta sulmojnë njëra-tjetrën. Por, anëtari i Komisionit për Siguri nga radhët e PDK-së, Rashit Qalaj, kundërshton këtë ide të qeveritarëve duke thënë se një ide e tillë është e dëmshme për Kosovën.

Sipas tij, një marrëveshje me njohje reciproke do të ishte zgjidhja e duhur.

“Definitivisht kjo qeveri e ka humbur kompasin. Me kë do të bëjë traktat paqeje, me ata që i kanë vrarë edhe fëmijët në djep, me ata që kanë dhunuar edhe vajzat e mitura, me ata që përveç që i kanë vrarë edhe i kanë djeg kufomat, me ata që ende sot i kanë zhduk trupat e të vdekurve. Ky është një veprim i dëmshëm, i papranueshëm dhe që duhet të gjykohet shumë nga të gjithë”, tha Qalaj.

Krerët e institucioneve të Kosovës së fundmi kanë shfaqur shqetësim se grupet e armatosura serbe për rreth kufirit me Kosovën po bëjnë përgatitje për sulme të rena në veri. Qeveria ka kërkuar nga Serbia dorëzimin tek organet e drejtësisë së Kosovës organizatorin e sulmit terrorist Millan Radoiçiq.