Izraeli sulmon Gazën nga ajri, deti dhe toka pasi Hamasi njoftoi tërheqjen nga bisedimet e armëpushimit

Izraeli ka goditur Rripin e Gazës nga ajri, deti dhe toka, me Hamasin që ka njoftuar se po tërhiqet nga bisedimet e armëpushimit.

Bëhet e ditur se me predha janë goditur lagjet Tal Al-Hawa, Sheikh Ajlin dhe Al-Sabra në qytetin e Gazës, ndërsa dëshmitarët thanë se ushtria izraelite ka bombarduar zonën Al-Mughraqa dhe kampin e refugjatëve Nuseirat në qendër të Gazës.

Ndërkohë, të tjerë dëshmitarë raportuan zjarr në lindje të Khan Younis në jug, si dhe bombardime me helikopterë Apache në zonat perëndimore të Rafahut.

Ushtria izraelite konfirmoi se po e vazhdon aktivitetin e saj në të gjithë territorin dhe deklaroi se ka kryer bastisje në Rafah dhe qendër të Gazës, por edhe sulme ajrore.

Siç raportohet, bombardimet erdhën pasi u pakësuan perspektivat për një armëpushim dhe një marrëveshje për lirimin e pengjeve.

Kjo pasi Hamasi ka njoftuar se po tërhiqet nga bisedimet për armëpushim, shkruan yahoonews, përcjell Telegrafi.

Vendimi pasoi sulmet izraelite që synuan kreun e krahut ushtarak të Hamasit, Mohammed Deif.

Fati i Deifit mbetet i panjohur, me kryeministrin izraelit, Benjamin Netanyahu, që tha se “nuk është e sigurt” nëse Deif kishte vdekur, ndërsa një zyrtar i lartë i Hamasit tha se ai ishte “mirë” dhe duke mbikëqyrur operacionet.

Sipas zyrtarëve palestinezë, Hamasi është shprehur i gatshëm për të rifilluar negociatat kur qeveria izraelite “të demonstrojë seriozitet në arritjen e një marrëveshjeje armëpushimi dhe një marrëveshje për shkëmbimin e të burgosurve”.

Javën e kaluar, presidenti i SHBA-së, Joe Biden, tha se një marrëveshje mund të jetë afër, me të dy palët që kishin rënë dakord për një kornizë.

I menjëhershëm ka qenë reagimi i Hamasit i cili e sulmoi SHBA-në duke e akuzuar atë për mbështetje të “gjenocidit”.

Ndryshe, lufta ka shkatërruar territorin palestinez dhe pjesën më të madhe të infrastrukturës së saj, duke lënë shumicën e banorëve të zhvendosur dhe duke shkaktuar një mungesë të madhe ushqimi, ilaçesh dhe mallra të tjera bazë.