S’kalon kërkesa e opozitës që tri projektligje të hiqen nga rendi i ditës

Partitë opozitare nuk i patën votat për t’i hequr nga rendi i ditës projektligjet për Këshillin Prokurorial të Kosovës (KPK), për Komisionin e Pavarur të Mediave (KPM) dhe Ligjin për zyrtarët publikë.

Partia Demokratike e Kosovës kërkoi që nëpërmjet një rezolute Qeveria t’i largojë këto tri projektligje, derisa këtë e mbështetën edhe Lidhja Demokratike e Kosovës dhe Aleanca për Ardhmërinë e Kosovës.

Shefi i Grupit Parlamentar të PDK, Abelard Tahiri, ka thënë se kërkojnë që këto projektligje të tërhiqen nga rendi i ditës.

“E ftojmë Qeverinë që këto tri projektligje të tërhiqen dhe të bashkëpunojmë. Në propozojmë që ky mocion të jetë pikë e parë”, ka thënë ai.

Shefi i GP të LDK-së, Arben Gashi, ka thënë se këto projektligje kanë përmbajtje antikushtetuese.

“Vlerëson që mocioni është i arsyeshëm dhe këto tri ligje kanë përmbajte antikushtetuese dhe duhet të tërhiqen nga rendi i ditës dhe Kuvendit mos t’i votojë. Të mos shqyrtohen në lexim të dytë”, ka thënë ai, raporton EO-ja.

Shefi i GP të AAK-së, Besnik Tahiri, tha se Qeveria përmes këtyre ligjeve po dëshiron që t’i kapë këto institucione.

“Si opozitë mendojmë që kjo mundet me qenë në ndonjë seancat më të dëmshme të kësaj legjislature. Do të krijojnë dëme afatgjate”, ka thënë ai.

E deputeti i LVV-së Adnan Rrustemi, ka thënë se këto projektligje përmbushin standarde më të mira ndërkombëtare.

“Të tria projektligjet kanë ndjekur secilën procedurë më palët e interesit. Është e pashembullt që deputetët e opozitës nuk bëjnë as një propozim dhe vijnë në seancë plenare dhe kërkojnë të tërhiqen. Përmbushin standardet më të mira ndërkombëtare”, ka thënë ai.