Stradner: Serbia në Samitin e NATO-s, iluzion optik e jo ndërrim i kursit

Ivana Stradner, specialiste në fushën e sigurisë dhe informacionit, gjithashtu vëzhguese e zhvillimeve politike në Ballkanin Perëndimor, duke folur për “Radio Evropa e Lirë” rreth pjesëmarrjes së Serbisë – ushtarakisht neutrale – në Samitin e NATO-s në Uashington të Shteteve të Bashkuara (SHBA), theksoi se kjo nuk është shenjë e ndryshimit të orientimit të Serbisë.

“Fakti që Serbia merr pjesë në samit nuk është shenjë e një ndryshimi në rrjedhën e politikës dhe pamja e madhe nuk duhet humbur nga detajet e vogla”, vlerësoi ajo, ndërsa shtoi se presidenti i Serbisë, Aleksandar Vuçiç, nuk e ka ndërmend ta afrojë Serbinë me NATO-n, por luan një “lojë të dyfishtë” në përpjekje për të ruajtur balancës mes Lindjes dhe Perëndimit.

Stradner po ashtu potencoi se qasja e Serbisë ndaj NATO-s është një “iluzion optik” në këtë kontekst: “Pra, samiti i NATO-s është një mundësi tjetër që presidenti serb të tregojë aftësitë në ruajtjen e ekuilibrit midis Lindjes dhe Perëndimit”, nënvizoi ndër të tjera ajo.

Aleanca midis Serbisë dhe Rusisë është themeluar mbi një ndjenjë të thellë pakënaqësie ndaj NATO-s për mbështetjen dhe krijimin e shtetit të pavarur të Kosovës. Rusia dhe Kina janë dy fuqitë e vetme botërore që përsërisin rregullisht gatishmërinë për t’i ofruar Serbisë “garanci” se Kosova nuk do të fitojë njohje të plotë ndërkombëtare dhe ulëse në Kombet e Bashkuara (OKB).

Ndryshe, mbetet e paqartë nëse Serbia do të ndjekë politika të favorshme ndaj stabilitetit rajonal. Presidenti i Serbisë ka parashikuar se viti 2024 do të sjellë “shumë më shumë konflikte dhe trazira” në rajon. Serbia, gjatë gjithë historisë, ka marshuar sipas një daulleje krejt të ndryshme nga pjesa tjetër e botës perëndimore liberale, duke rreshtuar veten krah Rusisë dhe Kinës.