SHKK: Faton Hajrizi ishte transferuar nga Dubrava në Smrekonicë për shkak të sjelljes së mirë

Shërbimi Korrektues i Kosovës thotë se i burgosuri Faton Hajziri, i cili u arratis ditë më parë nga Qendra Korrektuese në Smrekonicë, ishte dërguar në burgun e tipit të hapur, për shkak të sjelljes së mirë.

“I dënuari F.H. ka qenë larguar disa herë në të kaluarën nga institucionet korrektuese. Megjithatë, vitet e fundit ka shfaqur sjellje të mira dhe ka respektuar të gjitha rregullat e rendit shtëpiak”.

“Gjatë qëndrimit në Qendrën Korrektuese në Dubravë, ai ka përfunduar shkollimin e mesëm të lartë, ka marrë pjesë në programe rehabilituese dhe aktivitete rekreative. Bazuar në këto sjellje, ai ka kaluar në trajtim të avancuar dhe ka realizuar disa herë të drejtën e pushimit jashtë institucionit korrektues”.

SHKK-ja përmendi edhe disa kritere që kur plotësohen nga të dënuarit, mund të fitojnë të drejtën të vuajnë dënimin në burgun e tipit të hapur.

“Sipas rregullores për trajtimin e të burgosurve, të dënuarit mund të vendosen në një institucion të tipit të hapur nëse plotësojnë kriteret e mëposhtme:

– Janë shfrytëzues të benificioneve;

– Nuk kanë vepra të tjera në pritje për ekzekutim;

– Kanë dënim deri në 10 vjet ose mbetje të dënimit deri në 10 vjet.

I dënuari F.H. deri më tani ka mbajtur 17 vjet e pesë muaj të dënimit, ndërsa kishte mbetje të dënimit prej 7 vjetësh e gjashtë muajsh. Ai ka shfrytëzuar disa herë të drejtën e benificionit të vikendit në shtëpi, hera e fundit e kthimit nga vikendi ishte më 03.07.2024”.