Gërvalla për Tony Blairin: Mbështetësi më i fuqishëm i popullit të Kosovës dhe çlirimit të vendit

Ministrja e Punëve të Jashtme dhe Diasporës, Donika Gërvalla, ka mirëpritur mbrëmë në Aeroportin e Prishtinës ish-kryeministrin britanik, Tony Blair.

Gërvalla në një postim në Facebook ka shkruar se gjatë luftës ai u shqua si mbështetësi më i fuqishëm i popullit të Kosovës dhe çlirimit të vendit.

“Mbrëmë pata privilegjin e jashtëzakonshëm t’i uroj mirëseardhjen në Republikën e Kosovës ish-kryeministrit të Britanisë së Madhe, Tony Blair. Gjatë luftës ai u shqua si mbështetësi më i fuqishëm i popullit të Kosovës dhe çlirimit të tij, duke qenë ndër figurat kryesore të nismës së përbashkët të 19 shteteve anëtare të NATO-s për ndaljen e luftës dhe gjenocidit në Kosovë”, shkroi Gërvalla.

Ajo ka shtuar se si mik i madh i Kosovës Blairi do të marrë pjesë në shënimin e 25-vjetorit të çlirimit të Kosovës nga okupatori serb.

“Sot, ai do t’u drejtohet deputetëve të Kuvendit të Kosovës në një seancë solemne”, shkroi Gërvalla.