MPJ-ja konfirmon se Maqedonia e Veriut do ta respektojë Marrëveshjen e Prespës

Ministria e Punëve të Jashtme e Maqedonisë së Veriut konfirmon se do t’i respektojë të gjitha marrëveshjet ndërkombëtare, duke përfshirë edhe Marrëveshjen e Prespës, e nënshkruar me Greqinë.

“Ministria e Punëve të Jashtme konfirmon orientimin e qartë të vendit në respektimin pa mëdyshje të dispozitave kushtetuese, si dhe të të gjitha obligimeve të ndërmarra ndërkombëtarisht, si respektimi i plotë i Marrëveshjes për Partneritet Strategjik ndërmjet Republikës së Maqedonisë së Veriut dhe Republikës së Greqisë, e njohur si Marrëveshja e Prespës. Gjatë shtatë viteve të fundit dy vendet fqinje kanë zhvilluar një nivel jashtëzakonisht të lartë të dialogut politik, i cili ka rezultuar në një rritje të disafishtë të bashkëpunimit ekonomik dhe në ndërtimin e marrëdhënieve pozitive mes qytetarëve. Këto përfitime rezultuan me anëtarësimin e vendit në NATO, hapjen e negociatave me Bashkimin Evropian, si dhe avancimin e Partneritetit Strategjik në Dialog Strategjik me Shtetet e Bashkuara të Amerikës”, thuhet në deklaratën e MPJ-së.

Bëjmë thirrje, theksojnë nga atje, për kujdes nga të gjithë aktorët politikë, veçanërisht funksionarët e zgjedhur shtetëror. Ruajtja e kursit euroatlantik të vendit është interes themelor strategjik dhe garantues i sigurisë dhe stabilitetit afatgjatë të vendit.