Të gjithë në Japoni do të kenë të njëjtin mbiemër deri në vitin 2531, nëse ligji nuk ndryshon

Të gjithë në Japoni do të kenë të njëjtin mbiemër deri në vitin 2531, nëse nuk ndryshohen ligjet për të lejuar çiftet e martuara të kenë mbiemra të ndryshëm, sipas një studimi të ri.

Siç shkruan Sky News, Sato është mbiemri më i popullarizuar në Japoni, i cili ndahet nga 1.5 për qind e popullsisë.

Studimi, i udhëhequr nga Hiroshi Yoshida, profesor në universitetin Tohoku, projekton që do të rritet në 100 për qind në pak më shumë se 500 vjet, nëse nuk ka ndryshim në legjislacionin që aktualisht kërkon që çiftet e martuara të marrin ose mbiemrin e burrit ose gruas.

Profesori Yoshida theksoi se vlerësimi i tij ishte “llogaritur mekanikisht bazuar në një skenar të supozuar”, sipas gazetës japoneze The Mainichi.

“Nëse të gjithë bëhen Sato, mund të na duhet të na drejtohen me emrat tanë ose me numra. Nuk mendoj se mund ta quajmë një botë të mirë në të cilën jetojmë”, shtoi Yoshida.

Sipas hulumtimit, përqindja e japonezëve të quajtur Sato u rrit 1.0083 herë nga viti 2022 në 2023.

Nëse kjo normë mbetet konstante – pa asnjë ndryshim në ligj – gjysma e popullsisë japoneze do ta ndajë atë mbiemër në 2446, duke u rritur në 100 për qind në 2531.

Yoshida tha se të gjithë që kanë të njëjtin mbiemër “jo vetëm që do të jenë të papërshtatshëm, por gjithashtu do të minojnë dinjitetin individual”.

“Kjo do të çonte edhe në humbjen e trashëgimisë familjare dhe rajonale të lidhur me mbiemrat”, shtoi profesori japonez. /Telegrafi