Kurti në Londër: Vendi im quhet Republika e Kosovës, jo “Kosova e Metohija”
Kryeministri Albin Kurti ka deklaruar se Kosovën e njohin tri nga katër vendet fqinje, duke shtuar se njihet si Republika e Kosovës “e jo si Kosova e Metohija”.
Në Samitin e Investimeve në Ballkanin Perëndimor, që po mbahet në kuadër të Samitit në Londër, Kurti u shpreh se po t’i referohej Kosovës me “Metohija”, duhej t’i referohej edhe Serbisë më ndryshe.
“Vendi im quhet Republika e Kosovë, jo si i është referuar këtu ‘Kosova e Metohija’. Po të shkoja në këtë rrugë, do të merrja shumë kohë, pasi pos Serbia, do të duhej të thosha Serbia e Vojvodina, Sanxhaku, Toplica Rashka dhe Lugina e Preshevës. Më mirë të përqendrohemi në ekonomi”, tha Kurti.
Në panel me Kurtin është edhe kryeministrja e Serbisë Ana Bërnabiq, që disa herë u lavdërua për zhvillimin ekonomik.
Ndërkaq, Kurti ka shtuar se e përkrah Ukrainën dhe pret që “sa më parë ajo ta fitojë luftën”.
“Nuk kemi lidhje me Federatën Ruse. I kemi vu sanksione e duam që Ukraina të fitojë këtë luftë. Ukraina të dalë fituese dhe na duhet bota e Evropa demokratike që të shohim të mposhtur Kremlinin”, ka theksuar ai.