Norvegjia i gëzohet arrestimit të kosovarit, që dyshohet për terrorizëm e vrasje
Dy vëllezër nga Kosova janë të arrestuar për vrasjen e një 20-vjeçari në Norvegji në vitin 2021. Ata ishin dënuar më parë për terrorizëm. Njëri, i cili kishte luftuar për ISIS-in, ishte arrestuar para një viti në Norvegji, ndërsa tjetri, i arrestuar dje në Ferizaj me ndihmë edhe të AKI-së, i kishte dërguar para një organizate terroriste. Një tjetër vëlla i tyre ishte vrarë më parë në Siri.
Visar Avdyli, një nga dy vëllezërit e akuzuar për vrasjen e 20-vjeçarit Hamse Hashi Adan në Mortensrud të Oslos në Norvegji në vitin 2021 është arrestuar nga Policia në Kosovë mëngjesin e së mërkurës në Ferizaj.
Prokurori policor Borge Enoksen në qarkun policor të Oslos konfirmoi gjithashtu arrestimin.
“Familjarët janë të lehtësuar dhe shpresojmë se çështja tani do të ketë një përfundim të drejtë”, tha avokatja ndihmëse Catharina Gjesti për mediumin norvegjez, NRK.
Hamse Hashi Adan, 20-vjeçari i cili u qëllua më 7 tetor 2021 dhe vdiq të nesërmen pa mundur t’u mbijetojë plagëve.
Avokati i Avdylit, Oyvind Bratlien, u njoftua zyrtarisht për arrestimin.
NRK e ka pyetur atë nëse ka pasur kohë të fliste me klientin e tij.
“Jo. Tani duhet të kemi një pasqyrë dhe ta shqyrtojmë një udhëtim deri në Kosovë. Pastaj do të shohim se sa shpejt ai mund të shkojë në Norvegji. Shpresojmë se do të shkojë shpejt”, tha Bratlien.
Policia norvegjeze tashmë është në pritje të më shumë informacioneve për procesin e ekstradimit.
Gjatë arrestimit atij i është gjetur një armë zjarri, si dhe disa pasaporta të cilat me siguri janë të falsifikuara, njofton policia kosovare.
Vëllai tjetër i akuzuar për vrasjen, Valon Avdyli, u arrestua në zonën Gardermoen në Norvegji në mars të vitit 2023. Që atëherë ai është në paraburgim.
Një i akuzuar i tretë në këtë rast u lirua nga paraburgimi në verën e vitit 2022.
Çështje shumë serioze
Një të enjte në fillim të tetorit 2021, Hamse Hashi Adan ishte jashtë shkollës Lofsrud në Mortensrud. Ka pasur disa të rinj në zonë kur u qëllua Adan.
Familja bëri një deklaratë në ditët pas vdekjes së Adanit nëpërmjet avokatit të tyre John Christian Elden.
Familja nuk dinte asnjë rrethanë dhe as motiv për vrasjen e djalit.
“Familja është plotësisht e shkatërruar nga humbja, dhe nuk e kupton pse u qëllua”, tha Eldeni.
Shkolla mori ndihmë nga ekipi i krizave të qytetit për t’u kujdesur për nxënësit në ditët në vijim. Policia e hetoi rastin me mjete të mëdha.
“Kjo është një çështje shumë serioze. Është një vrasje e një të riu në një hapësirë ëpublike jashtë një shkolle”, tha prokurori i policisë Borge Enoksen gjatë një konference për shtyp pas vrasjes.
Vëllezërit nga Kosova të dënuar më parë për terrorizëm
Dy vëllezërit kosovarë nga Baerumi i Norvegjisë u dënuan për aktivitete terroriste në vitin 2016.
Valoni (37 vjeç) u dënua për pjesëmarrje në organizatë terroritste dhe u dënua me katër vjet e gjysmë burgim. Sipas aktgjykimit, ai kishte qenë luftëtar i ISIS-it.
Valon Avdyli në Siri. Foto e siguruar nga Shërbimi i Sigurisë Policore në Norvegji
Visari (35 vjeç) u dënua me tetë muaj burgim për dërgimin e parave për një organizatë terroriste. Ai gjithashtu ishte dënuar më parë për dhunë.
Të dy e kanë vuajtur dënimin.
Megjithatë, policia nuk sheh asnjë lidhje midis dënimeve të mëparshme dhe vrasjes në Mortensrud.
Vëllai tjetër i tyre, Egzon Avdyli ishte vrarë në Siri në prill të vitit 2014.
AKI-ja u angazhua në arrestimin e Visar Avdylit
Agjencia e Kosovës për Inteligjencë ndihmoi në zbulimin e vendndodhjes së Visar Avdylit dhe njësiti FAST i Policisë së Kosovës arriti ta arrestojë.
Visar Avdyli ndodhej në arrati prej dy vjet e gjysmë. /Express