Vesa Smolica në BBVA: Nuk ka jetë pas vdekjes, nuk ka fakte
Dy konkurrentët nga Kosova në BBVA, Vesa Smolica dhe Arta Kabashi kanë pasur një debat interesant për sa i përket temës “A ekziston jeta pas vdekjes?”.
Tema ishte zgjedhur në mënyrë rastësore më tërheqjen e një letre dhe vjen në kuadër të lojës nga Vëllai i Madh.
Këngëtarja nga Gjakova, Vesa Smolica tha se jeta pas vdekjes nuk ekziston, por që beson se energjia e njeriut mund të bartet.
“Unë nuk mendoj që ka jetë pas vdekjes, sepse nuk ka fakte. Mundet që trupi me u shpërbë në energji por jo me pas jetë pas vdekjes. Shpirti që del nga trupi shpërndahet dhe shndërrohet në energji. Por, nuk jetohet dhe thjesht shpërndahet në energji”, ka thënë Smolica.
Megjithatë, të njëjtin mendim nuk e ndanë kolegia e saj, njëherësh këngëtarja nga Peja, Arta Kabashi e cila duke cituar disa poetë mistikë tha se energjia e njerëzve ekziston edhe pas vdekjes.
“Unë mendoj se jeta pas vdekjes ekziston, se nga shumë poetë mistikë sikurse Rumi, janë cituar shumë shpesh duke thënë se njeriu, energjia e njeriut ekziston edhe pas vdekjes; ekziston në lule, në erë, ekziston në gjithçka që shpërbëhet shpirti i njeriut”, deklaroi Kabashi.
“Edhe në fenë islame edhe në fenë krishtere, thuhet se ka jetë të njerëzve pas vdekjes”, tha mes tjerash këngëtarja nga Peja.