Jessen-Petersen skeptik se mund të ketë sivjet marrëveshje ndërmjet Kosovës dhe Serbisë

Ish-shefi i Misionit të Kombeve të Bashkuara (OKB) në Kosovë, Soren Jessen-Petersen, ka folur për procesin e dialogut me Serbinë dhe themelimin e Asociacionit të komunave me shumicë serbe.

Jessen-Petersen, i cili mbikëqyri periudhën fillestare të përgatitjeve për statusin e Kosovës, nënvizoi angazhimin e BE-së për të arritur një marrëveshje në dialog.

“Dialogu është e vetmja rrugë përpara”, tha ai, duke i bërë thirrje BE-së të përdorë “integrimin në familjen evropiane si karotë ashtu edhe si shkop”.

Jessen-Petersen po ashtu theksoi mbështetjen e palëkundur të SHBA-së si një faktor kyç në procesin e dialogut.

Në lidhje me Asociacionin, Jessen-Petersen shprehu shqetësim për ndasitë e thelluara etnike, të cilat shton ai se mund të përforcohen nga kundërshtimet e opozitës dhe politikat e Beogradit.

Ai përkujtoi se Asociacioni ishte pjesë e marrëveshjes së Ahtisaarit.

“Kosova duhet të bëjë më shumë për të integruar serbët e shumtë me qëllime të mira në një ndjenjë përkatësie në Kosovë”, u shpreh ai për Telegrafin.

Ish-diplomati gjithashtu sinjalizoi “lëvizjet e vazhdueshme destabilizuese nga Beogradi”, si një shqetësim të vazhdueshëm për integritetin e vendit.

Pyetur në lidhje me pritshmëritë për arritjen e një marrëveshjeje eventuale mes Kosovës dhe Serbisë në kuadër të këtij viti, Jessen-Petersen u shpreh skeptik, duke e lidhur këtë hedhje në dyshim me “lidershipin aktual politik në Serbi”.