BE-ja po përgatit sanksione të reja për disa kompani, në mesin e tyre ka nga Serbia, Kina e India
Bashkimi Evropian (BE) po përgatit sanksione të reja për kompanitë kineze dhe indiane për shkak të lidhjeve të tyre me Rusinë dhe lista e “emrave të rinj” përfshin kompani në Serbi, Sri Lanka, Turqi, Tajlandë dhe Kazakistan, shkruan Financial Times (FT).
Brukseli po propozon vendosjen e sanksioneve ndaj tre kompanive kineze dhe një kompanie indiane, si pjesë e masave të fundit që synojnë t’i japin një goditje “makinerisë ruse të luftës”.
Sipas masave të propozuara, kompanive evropiane do t’u ndalohej të bëjnë biznes me kompanitë e listuara.
Brukseli kërkon të parandalojë çdo shmangie të kufizimeve të vendosura, veçanërisht kur bëhet fjalë për prokurimin e komponentëve elektronikë që mund të ripërdoren për përdorim në sistemet e armëve.
“Është gjithashtu e përshtatshme të përfshihen në atë listë disa entitete të tjera në vendet e treta që mbështesin indirekt kompleksin ushtarak dhe industrial rus … duke tregtuar në komponentë të tillë,” së bashku me disa kompani ruse, thuhet në dokument.
Propozimi do të ndalonte gjithashtu eksportin e komponentëve të dronëve në Rusi.
Paketa e sanksioneve, e cila pritet të miratohet përpara përvjetorit të dytë të pushtimit rus të Ukrainës më 24 shkurt, do të jetë e 13-ta e miratuar nga BE-ja.
Në listën e kompanive nën sanksione do të jenë gjithsej 643 kompani, nëse propozimi miratohet.
“Emrat e rinj përfshijnë edhe kompani në Sri Lanka, Turqi, Tajlandë, Serbi dhe Kazakistan”, shkruan FT.
Nëse anëtarët e BE-së miratojnë planin, do të jetë hera e parë që bizneset në territorin e Kinës dhe Indisë janë goditur nga sanksionet e BE-së.
Këto kompani, së bashku me një në Hong Kong, janë ndër 21 entitetet e listuara në një dokument të Komisionit Evropian të parë nga FT dhe të raportuara nga Bloomberg.
Diplomatët presin që më shumë se 200 individë të sanksionohen në draftet e ardhshme të propozimit.
Komisioni refuzoi të komentonte raportet e mediave dhe FT shtoi se i ishte drejtuar ambasadave kineze dhe indiane në Bruksel për koment.