Kryetarja e Speciales tregon nëse mund të ketë aktakuza të reja pas vdekjes së Dick Martyt, bazuar në raportin e tij
Ekaterina Trendafilova, kryetare e Dhomave të Specializuara të Kosovës ka treguar se mbi 100 dëshmitarë kanë dëshmuar të sigurt para gjykatës deri më tani.
Ajo ka deklaruar gjithashtu se ajo që njihet si Gjykatë Speciale, nuk ka qenë asnjëherë cak i presionit të ushtruar nga politikanët.
Në një intervistë për Kosovo-online, Trendafilova është pyetur edhe për pretendimet e ish-senatorit zviceran, Dick Marty (i cili ka vdekur javë më parë) dhe raportin e tij për “Shtëpinë e Verdhë.
Ajo është përgjigjur nëse në bazë të atij raporti mund të ngrihet ndonjë aktakuzë.
“Dhomat e Specializuara të Kosovës kanë juridiksion mbi krimet kundër njerëzimit, krimet e luftës dhe krimet e tjera sipas ligjit të Kosovës që supozohet se kanë ndodhur ndërmjet 1 janarit 1998 dhe 31 dhjetorit 2000, dhe të cilat janë kryer ose kanë filluar në Kosovë, ku autori ose viktima janë nga Kosova ose ish-Republika Federale e Jugosllavisë. Përveç kësaj, krimet duhet të lidhen me Raportin e Asamblesë Parlamentare të Këshillit të Evropës të vitit 2011”, ka deklaruar Trendafilova.
“Është e rëndësishme që ky raport nuk trajtoi vetëm akuzat në lidhje me ‘Shtëpinë e Verdhë’, por përshkroi një sërë akuzash serioze, duke përfshirë mungesën e funksionimit të llogaridhënies dhe mekanizmat që mund t’i adresojnë këto pretendime në një mjedis të pavarur dhe të sigurt. Kur bëhet fjalë për pyetjen nëse mund të ketë më shumë aktakuza apo cilat krime specifike do të ngarkohen në ndonjë aktakuzë të ardhshme, kjo nuk më takon mua ta them. Dhomat e Specializuara dhe Prokuroria e Specializuar janë dy institucione të veçanta. Është Prokurorja Speciale ajo që në bazë të provave të mbledhura si rezultat i hetimeve të saj, vendos se kë do të padisë dhe për çfarë krimesh”. /klankosova