Mungon ish-kryetari i Leposaviqit, shtyhet gjykimi për korrupsion e krim të organizuar ndaj tij dhe të tjerëve

Në mungesë të të akuzuarit Dragan Jabllanoviq, ish-kryetar i Leposaviqit, ka dështuar të mbahet seanca në rastin ku ai dhe të akuzuarit e tjerë ngarkohen për korrupsion e krim të organizuar.

Në këtë rast, aktakuza ngarkon Jabllanoviqin për “Pjesëmarrje ose organizim të grupit kriminal të organizuar” dhe “Keqpërdorim të pozitës ose autoritetit zyrtar”, së bashku me Haxhi Bejtën, Aleksandar Ackoviqin, Aleksandar Kostiqin, Çedomir Timotijeviqin, Bojan Banoviqin, Mirosllav Ivanoviqin, Ivan Kadiqin, Boban Millovanoviqin.

Ndërsa, të akuzuarit Xhemajl Ferizi, Haki Haxhiu, Mehdi Haxhiu, Mensur Rama dhe Nijazi Musliu po akuzohen për veprat penale “Pjesëmarrje ose organizim të grupit kriminal të organizuar” dhe “Keqpërdorim të autorizimeve ekonomike”.

Lidhur me mungesën e të akuzuarit Jabllanoviq, mbrojtësi i tij, avokati Ramë Gashi ka njoftuar gjykatën se i njëjti nuk ka mundur të jetë i pranishëm për arsye shëndetësore.

Kurse, kryetarja e trupit gjykues, gjykatësja Violeta Namani, ka obliguar avokatin Gashi që deri në përfundim të orarit të punës të sjellë një dokumentacion mjekësor, në të kundërtën do të ndërmarrë veprime të nevojshme procedurale.

Ndryshe, në këtë rast akuzohej edhe J.B., mirëpo më 16 tetor 2023, gjykata ka pushuar procedurën penale ndaj saj pasi që e njëjta ka vdekur.

Ndryshe, në aktakuzën e Prokurorisë Speciale të ngritur më 13 shtator 2021, thuhet se të gjithë të pandehurit aktivisht kanë vepruar si grup i organizuar kriminal, gjatë periudhës kohore 2015-2017, duke kryer vepra të rënda penale dhe duke ditur se do të kontribuojnë në realizimin e veprimtarive kriminale.

Të pandehurit në këtë rast, akuzohen se e kanë kryer veprat penale “Pjesëmarrja ose organizimi i grupit kriminal të organizuar”, “Keqpërdorimi i pozitës apo autoritetit zyrtar” dhe “Keqpërdorimi i autorizimeve ekonomike”.

Vepra penale “Pjesëmarrja ose organizimi i grupit kriminal të organizuar” nga Neni 283, paragrafi 1 të KPRK-së dënohet me gjobë deri në 250 mijë euro dhe me burgim prej së paku shtatë vjet, ndërsa sipas paragrafit 2 të këtij neni, kjo vepër dënohet me gjobë deri në 500 mijë euro dhe me burgim prej së paku 10 vjet.

Kurse, vepra penale “Keqpërdorimi i pozitës ose autoritetit zyrtar” nga Neni 422, paragrafi 1 dënohet me burgim prej gjashtë muaj deri në pesë vjet, kurse vepra penale “Keqpërdorimi i autorizimeve ekonomike” nga Neni 290, paragrafi 2, dënohet me burgim prej një deri në tetë vjet. Aktakuzën e plotë për këtë rast mund ta lexoni duke klikuar KËTU. /BetimipërDrejtësi