Gjendje alarmante me mbeturinat në Prishtinë, Rama e shkarkon drejtorin e Shërbimeve Publike

Komuna e Prishtinës është duke kaluar një gjendje alarmante në lidhje me menaxhimin e mbeturinave.

Për shkak të kësaj situate, kryetari Përparim Rama sot ka marrë vendim të shkarkojë drejtorin e Shërbimeve Publike, Ilirik Musliun, transmeton Zeri.info.

Lajmin e ka bërë të ditur i pari i Prishtinës, përmes një shkrimi në Facebook.

Njoftimi i plotë:

Të dashur qytetarë,

Të gjithë jemi dëshmitarë të gjendjes aktuale alarmante në Kryeqytet lidhur me menaxhimin e mbeturinave. Si Kryetar i Kryeqytetit, tash e një vit kam kërkuar në vazhdimësi nga drejtoria përkatëse zgjidhje të kësaj situate alarmante dhe të papranueshme. Por, përkundër të gjitha këtyre kërkesave, gjendja jo që nuk është përmirësuar, por përkundrazi është përkeqësuar.

Andaj, sot, kam marrë VENDIM për të liruar nga detyra Drejtorin e Shërbimeve Publike.

Për më tepër, ju njoftoj se, në cilësinë e Kryetarit të Kryeqytetit, kam bërë përpjekje duke krijuar një Task Force dhe kam ndarë buxhet shtesë për këtë drejtori dhe ndërmarrjen përkatëse, por përkundër kësaj mbështetje të vazhdueshme nuk ka pasur rezultate nga drejtoria në fjalë.

Prandaj, kam vendosur që të ndërhyjë dhe të marrë përsipër zgjidhjen e kësaj situate.