Volejbolli kosovar në zi, vdes volejbollistja Vlora Hyseni

Volejbollistja e klubit Prishtina Volley, Vlora Hyseni ka vdekur sot (e enjte) duke çuar në zi volejbollin kosovar, por edhe sportin në përgjithësi.

Klubi i volejbollit Prishtina Volley ka njoftuar se volejbollistja e tyre, Vlora Hyseni ka vdekur sot.

Faqja e klubit në Facebook e ka përshkruar të ndjerën si një vajzë të edukuar e të disiplinuar, e mbi të gjitha një nënë të përkushtuar.

“Komuniteti i volejbollit, sot më datë 18.01.2024 humbi një ndër volejbollistet më të mira të klubit tonë, Vlora Hysenin”.

“Do të mbetesh e paharruar në kujtimet tona Vlora. I lehtë të qoftë dheu. Pusho në paqe”, shkruan në faqen e klubit Prishtina Volley.

Përveç, klubit prishtinas, edhe Federata e Volejbollit e Kosovës ka dërguar një telegram ngushëllimi pas vdekjes së Vlora Hysenit.

“Me dhimbje e morëm lajmin e hidhur për kalimin në amshim të ish-volejbollistes Vlora Hyseni. Vlora, që kontribuoi drejtpërdrejt në sportin kryeqytetas duke qenë pjesë e klubit Mabetex e më vonë edhe Kolegji AAB, do të kujtohet përherë për pozitivitetin dhe profesionalizmin”.

“Humbja e Vlorës, lë boshllëk në komunitetin tonë, por ajo do të mbetet mes nesh përherë për kujtimet e mira që na la. FVK i shpreh ngushëllimet e sinqerta familjes Hyseni, miqve e dashamirëve, me të cilët rrethohej në jetë e karrierë”, thuhet në telegramin e FVK-së.