Tre policë sulmohen nga persona të panjohur në Ferizaj

Tre zyrtar policorë kanë pësuar lëndime derisa ishin në kryerje të detyrës zyrtare, pasi janë goditur nga tre persona të panjohur.

Në raportin ditor të Policisë së Kosovës bëhet e ditur se rasti ka ndodhur të hënën, rreth orës 15:06, në rrugën “Gursel dhe Bajram Sylejmani”, në Ferizaj.

Tutje, bëhet e ditur se të dyshuarit në tentativë për t’u larguar nga vendi i ngjarjes kanë shkaktuar aksident dhe e kanë braktisur veturën.

“Tre zyrtarë policorë kanë pësuar lëndime derisa ishin në kryerje të detyrës zyrtare, pasi një veturë në lëvizje në të cilën gjendeshin tre persona të panjohur i ka goditur zyrtarët, të cilët i kishin dhënë urdhër të dyshuarve për t’u ndalur me veturë. Të dyshuarit, në tentativë për t’u larguar nga vendi i ngjarjes, kanë shkaktuar aksident dhe e kanë braktisur veturën”, thuhet në raport.

Po ashtu, siç bëhet e ditur në raport, gjatë kontrollit në veturën e braktisur janë gjetur dhe konfiskuar 4.1 gramë substancë e dyshuar narkotike e llojit marihuanë dhe 0.2 gramë substancë e dyshuar narkotike e llojit kokainë. Nuk raportohet për të arrestuar, rasti në hetime.