Nga Parisi, kryeministri Kurti udhëton për në Vjenë

Kryeministri i Kosovës ka udhëtuar sot për në Vjenë për të marrë pjesë në edicionin jubilar të 20-të të Forumit Ekonomik të Vjenës.

Bëhet e ditur se ai po ashtu do ta pranojë Çmimin Vjetor të Forumit Ekonomik “Partneri i Vitit 2023”, që do t’i ndahet Republikës së Kosovës për bashkëpunimin dhe kontributin 15-vjeçar në zhvillimin ekonomik në nivel kombëtar dhe rajonal, raporton Zeri.info.

Përveç kësaj Kurti do të jetë pjesëmarrës edhe në panelin e diskutimit me titull “Ndërtimi i Bashkëpunimin Ekonomik në Kohë të Vështira”, nesër prej orës 14:05.

“Gjatë qëndrimit dyditor, Kryeministri Kurti, po ashtu do të jetë mysafir i ftuar nga Karl-Renner-Institut për të diskutuar mbi temën “Kosova: Shteti i ri demokratik si peng i interesave gjeopolitike”. Diskutim ky që do të mbahet të hënën, duke filluar nga ora 18:00.

Ndërkaq, të martën do të zhvillojë takime me përfaqësues të kompanive private të sektorit të energjisë, për t’i njoftuar më për së afërmi me mundësitë për investime që Kosova ofron në këtë fushë”, thuhet në komunikatë. /Zëri