Vedat Muriqi shënon në barazimin e Mallorcas ndaj Rayo Vallecanos
Vedat Muriqi ka vazhduar edhe sot me paraqitje të shkëlqyeshme, teksa Mallorca nuk ia doli të merr më shumë se një pikë ndaj Rayo Vallecanos.
Kësisoj, skuadra e drejtuar nga Javier Aguirre regjistroi ndeshjen e tretë radhazi pa fitore.
Ndeshja përfundoi me rezultatin 2:2. Muriqi, i cili kompletoi 90 minutat e radhës, ishte autor i golit të parë për “Piratët”.
Sulmuesi kosovar shënoi në minutën e 44-t. Për 29-vjeçarin ishte ky goli i tij i katërt për këtë sezon në elitën e futbollit spanjoll. Ai ka gjithashtu edhe një asistim.
Antonio Sanchez (59′) e shënoi golin tjetër për skuadrën mysafire.
Ndërkaq, golat për vendasit u shënuan nga Alvaro Garcia (4′) dhe Radamel Falcao (90+12′) nga penalltia.
Mallorca pas këtij barazimi ka shtatë pikë dhe ndodhet në pozitën e 14-të në tabelë.
Rayo Vallecano ka pesë pikë më shumë dhe pozicionohet në vendin e shtatë.