Për tetë muaj Inspektorati Farmaceutik ka shqiptuar mbi 100 gjoba

Inspektorati Farmaceutik i Ministrisë së Shëndetësisë, gjatë periudhës janar - gusht të këtij viti ka realizuar 635 inspektime, ndërsa ka gjobitur 114 subjekte.

Ministria e Shëndetësisë ka bërë të ditur se në vazhdën e aksioneve kontrolluese janë gjobitur 54 subjekte që posedonin produkte të jashtëligjshme, ndërsa 43 raste kur gjatë kontrollit ka rezultuar se në farmacitë e ndryshme mungon farmacisti, siç është e përcaktuar me ligj, transmeton Zeri.info.

Gjithashtu, gjatë kësaj periudhe, Inspektorati Farmaceutik ka ndërmarrë masa edhe ndaj katër institucioneve shëndetësore private, të cilat nuk ishin të licencuara.

“Ndaj të gjitha rasteve të cilat e kanë cenuar shëndetin publik janë ndërmarrë masat sipas autorizimeve ligjore. Ditë më parë, ministri i Shëndetësisë dr. Arben Vitia gjatë vizitës në Inspektoratin Shëndetësor bëri të ditur se nga muaji shtator inspektorëve do t'u paguhen shtesat në vlerë të 250 eurove. Së shpejti do të shtohen edhe kapacitetet inspektuese dhe pas përfundimit të procedurave rekrutuese, numri i inspektorëve shëndetësorë do të shkojë në 37, nga 12 sa janë tani”.

“Me qëllim të mbrojtjes së shëndetit publik, ofrimit të shërbimeve shëndetësore cilësore dhe zbatimit të ligjit, ftojmë qytetarët të bashkëpunojnë dhe të sinjalizojnë kur hasin në veprimtari të dyshimta të institucioneve shëndetësore”, thuhet në njoftim. /Zëri