Jasharaj: Mësimdhënësit të mos i largojnë nga klasa nxënësit që s’kanë tekste shkollore

Kryetari i Sindikatës së Bashkuar të Arsimit, Shkencës dhe Teknologjisë, Rrahman Jasharaj, ka kërkuar nga të gjithë mësimdhënësit që të mos largojnë nga klasa nxënësit që nuk kanë tekste shkollore.

Jasharaj në tryezën e organizuar nga AAK-ja, ku po diskutohet për tekstet shkollore, tha se ka disa zëra që disa mësimdhënës po u bëjnë presion nxënësve lidhur me tekste shkollore.

“Paska ndonjë mësimdhënës që po u bën presion nxënësve, që nëse nuk kanë tekste shkollore se do t’ largojnë nga ora. Të bëjmë apel, që mësimdhënësit e Kosovës të mos i largojnë nga klasa nxënësit që nuk kanë mjete shkollare. Uroj të mos kemi situata të tilla më”, u shpreh ai.

Gjatë diskutimit, Jasharaj tha se ministrja e MASHTI-t, Arbërie Nagavci, po vazhdon të mbajë inat ndaj SBASHK-ut, duke mos i takuar qe shtatë muaj.

“Ta ngrisni zërin, jo për tekstet, por për arsimin, gjithë këto të meta po ndodhni pasi Nagavci është duke mësuar qasjen e gabuar të kryeministrit Kurti, që t’i nënçmojë sindikatat dhe të mos flasë me ta. MASHTI nuk po na pyet asgjë, ka shtatë muaj që Nagavci nuk na takon dhe gjuan fjalë nga anash”, tha mes të tjerash ai.

Tryeza ku po diskutohet për tekste shkollore ka nisur rreth orës 11:00.