Kosova e nis me fitore, mposht bindshëm Zvicrën në “Sezai Surroi”

Kosova ka shënuar fitore ndaj Zvicrës me rezultat 76:49 (18:16, 23:8, 27:14, 8:11), në ndeshjen e parë të raundit të tretë të parakualifikimeve për Eurobasket 2025.

Në palestrën “Sezai Surroi” në Prizren, Kosova e dominoi ndeshjen nga fillimi deri në fund, duke mos e rrezikuar asnjëherë fitoren.

Çereku i parë ishte kryesisht i barabartë, ku asnjëra nuk arrinte të shkëputej në epërsi, derisa përfundon 18:16. Dardanët ‘ndezën’ motorët në periudhën e dytë. Me një lojë të shpejtë filluan shkëputjen, duke shkuar në pushim me rezultat 41:24.

Kosova nuk u ndal as në periodën e tretë, ku jo vetëm që ruajti epërsinë, por edhe e thelloi, madje kishte epërsi deri në 31 pikë, 65:34, ndërsa rezultati pas 30 minutash ishte 68:38.

Dardanët ruajtën epërsinë në dhjetë minutat e fundit dhe menaxhuan lojën, duke triumfuar bindshëm 76:49.

Te Kosova u dalluan Dardan Berisha me 20 pikë, Drilon Hajrizi me 14 pikë e 12 kërcime dhe Dominic Artis me 19 pikë e gjashtë asistime.

Ndeshja e ardhshme për Dardanët do të jetë kundër Danimarkës në udhëtim më 26 korrik.

Tri ditë më vonë janë mysafirë të Zvicrës, kurse kampanjën kualifikuese për Rrethin e Tretë për Eurobasket 2025, e përmbyllin me sfidën kundër Danimarkës më 5 gusht në Prizren. /telegrafi