Gruaja e policit Shemsi Mustafa: Na kanë njoftu që kanë me i liru, s’na kanë tregu konkretisht se kur

Institucionet në Serbi tashmë kanë marrë vendim për lirimin e tre policëve që u rrëmbyen në territorin e Kosovës, në Leposaviq, më 14 qershor.

Shemsi Mustafa, Beqir Sefa, Rifat Zeka do të lirohen pas disa ditëve që u mbajtën në burgun e Kralevës.

Këtë për gazetën Infokus e ka konfirmuar bashkëshortja e njërit nga policët, Shemsi Mustafës, e cila ka thënë se janë njoftuar nga institucionet e Kosovës që tashmë është marrë vendimi për lirimin e tyre.

“Po na kanë njoftu që kanë me i liru, është marrë vendimi, por ende nuk na kanë tregu konkretisht se kur i lirojnë. Këtë informacion nuk e kemi”, ka thënë shkurt Shpresa Mustafa, derisa është shprehur tejet e gëzuar për këtë lajm të mirë.