Ndriçimin e Qeverisë me ngjyrat e flamurit të LGBT-së Mustafa e quan taktikë të Kurtit për vota

Në Ditën Ndërkombëtare kundër Homofobisë, Transfobisë dhe Bifobisë, Qeveria e Kosovës ndezi dritat me ngjyrat e flamurit të LGBT-së.

E kjo u bë e ditur nga vetë kryeministri i Kosovës Albin Kurti, përmes një postimi në Twitter, ku tha se është e drejtë njerëzore të jetosh pa frikë dhe në mënyrë autentike, shkruan Zeri.info.

Por ndaj këtij vendimi të Qeverisë ka reaguar deputeti i LDK-së, Besian Mustafa, i cili Kurtin e quajti mashtrues tipik.

Mustafa tha se Kurti poston në Twitter në gjuhën angleze për t’i mashtruar votuesit pro-LGBT, por që të njëjtën nuk e poston në Facebook në gjuhën shqipe.

Sipas tij, kjo tregon se kreu i Qeverisë nuk ka parime, por vetëm taktika për grabitje votash.

“Mashtrues tipik.

Poston në Twitter në anglisht për t’i mashtruar votuesit e tij pro-LGBT, por nuk e poston të njëjtën në Facebook në shqip për t’i mashtruar votuesit e tij anti-LGBT.

Dmth ky nuk ka parime, ka vetëm taktika për grabitje votash. Mashtrues tipik”, shkroi në Facebook. /Zëri