Mbi 21 vjet burgim rahovecianit që vrau vëllain për bagëti
Me 21 vjet e 6 muaj është dënuar J.G., i akuzuar për vrasjen e vëllait të tij në Rahovec, pas një mosmarrëveshjeje rreth disa bagëtive.
Sipas njoftimit nga Gjykata Themelore në Gjakovë, i njëjti është dënuar për veprat “Vrasje e rëndë” dhe “Mbajtja në pronësi, kontroll ose posedim të paautorizuar të armëve”.
“I pandehuri J.G. akuzohet se më 12 qershor 2021 në fshatin Sopniq të Rahovecit, në oborrin e shtëpisë së tij, pas një mosmarrëveshje rreth disa bagëtive ka privuar nga jeta vëllain e tij H.G. 65-vjeçar”, thuhet në njoftim.
Gjithashtu gjykata thotë se ka vënë në rrezik edhe dy djemtë e viktimës.
Mosmarrëveshja ka filluar kur viktima ka shkuar në oborrin e J.G. për t’ia dërguar bagëtinë.
Pas mosmarrëveshjes, J.G. e ka nxjerrë revolen nga xhepi dhe ka shtie disa herë në drejtim të ndjerit i cili ishte në ikje e sipër.
Njoftimi i plotë, pa ndërhyrje:
21 vjet e 6 muaj burgim ndaj të pandehurit J.G., për vrasje të rëndë
Gjakovë, 24 janar 2023 - Gjykata Themelore në Gjakovë, ka shpall aktgjykim dënues ndaj të pandehurit J.G., shtetas i Republikës së Kosovës, i cili sipas aktakuzës së Prokurorisë Themelore në Gjakovë, akuzohet për vepër penale “Vrasja e rëndë” dhe “Mbajtja në pronësi, kontroll ose posedim të paautorizuar të armëve”, vepra të sanksionuara me Kodin Penal të Republikës së Kosovës (KPRK).
Trupi gjykues i Departamentit për Krime të Rënda, e shpalli fajtor dhe i shqiptoi dënim unik me burgim në kohëzgjatje prej njëzet e një (21) vjet e gjashtë (6) muaj.
I pandehuri J.G., akuzohet se “më 12 qershor 2021, rreth orës 21:25, në fshatin Sopniq të Rahovecit, i akuzuari J.G., në oborrin e shtëpisë së tij, pas një mosmarrëveshje rreth disa bagëtive ka privuar nga jeta vëllanë e tij H.G, i moshës 65 vjeçare dhe ka vënë në rrezik jetën e të dëmtuarve A.G. dhe A. G.(1)., në atë mënyrë që viktima së bashku me dy djemtë e tij shkojnë në oborrin e të akuzuarit për t’ia dërguar bagëtinë dhe aty pas një fjalosjeje të çastit i akuzuari J.G., e nxjerrë një revole nga xhepi i djathtë i pantallonave dhe atë të tipit “Zoraki”, e me të njëjtën shtie disa herë në drejtim të tani të ndjerit, i cili në ikje e sipër qëllohet me dy të shtëna, duke i shkaktuar plagë vdekjeprurëse”.
Kundër këtij aktgjykimi, palët kanë të drejtë ankese në afat prej pesëmbëdhjetë (15) ditëve nga dita e pranimit të aktgjykimit në formë të shkruar.