DASH: SHBA-ja e zhgënjyer, Kurti e Vuçiqi duhet të bëjnë lëshime për të mos rrezikuar paqen e fituar me dekada të vështira

Zëdhënësi i Departamentit amerikan të Shtetit, Ned Price, ka deklaruar se SHBA-ja është tejet e zhgënjyer me liderët e Kosovës dhe Serbisë, pas mospajtimit për targat në Bruksel.

Në një deklaratë në faqen zyrtare të DASH-it, Price u bëri thirrje kryeministrit Albin Kurti dhe presidentit serb Aleksandar Vuçiq që të punojnë me përfaqësuesin e lartë të BE-së Borrellin dhe përfaqësuesin special të BE-së Lajçakun për të arritur një kompromis të drejtë.

“Shtetet e Bashkuara janë të zhgënjyera që liderët e Kosovës dhe Serbisë nuk arritën të bien dakord sot me përfaqësuesin e lartë të BE-së Borrellin për zgjidhjen e krizës aktuale në Kosovë. Ne i bëjmë thirrje kryeministrit Kurti që të punojë me përfaqësuesin e lartë të BE-së Borrellin dhe përfaqësuesin special të BE-së Lajçakun për të arritur një kompromis të drejtë”, thuhet në deklaratë.

Tutje, DASH-i thekson se Kurti dhe Vuçiqi do të duhej të bëjnë lëshime për të siguruar që ne të mos rrezikojmë paqen e fituar me dekada të vështira në një rajon tashmë të brishtë.

“Ne i bashkohemi BE-së për t’i bërë thirrje Kosovës që të pezullojë menjëherë çdo masë të planifikuar që do të përshkallëzonte tensionet, përfshirë vendosjen e gjobave të automjeteve. Të dyja palët duhet të përmbahen nga ndërmarrja e hapave provokues, të përmbushin detyrimet e tyre sipas dialogut të lehtësuar nga BE-ja dhe të angazhohen në mënyrë konstruktive për të arritur një zgjidhje të qëndrueshme”, deklaron Price.

The United States urges the governments of Kosovo and Serbia to avoid further escalation of tensions and to engage constructively in dialogue. Both parties must compromise to reach a negotiated settlement. https://t.co/JbOupqvfnu

— Ned Price (@StateDeptSpox) November 22, 2022