Osmani pritet nga homologu austriak, bisedojnë për situatën aktuale në Kosovë dhe dialogun me Serbinë

Presidentja e Kosovës, Vjosa Osmani, gjatë ditës së sotme është pritur në takim pune në pallatin Hofburg nga presidenti i Republikës së Austrisë, Alexander Van der Bellen.

Osmani e ka përgëzuar presidentin Van der Bellen për rizgjedhjen e tij në krye të shtetit të Austrisë, duke thënë se mezi pret hapjen e kapitujve të rinj të bashkëpunimit në mes të dy shteteve gjatë mandatit të tij të dytë, raporton Zerti.info.

Sipas saj, Austria është partnere strategjike dhe aleate e popullit të Kosovës, duke e vlerësuar lartë përkrahjen e saj për rrugën euroatlantike të Kosovës, përfundimin e procesit të liberalizimit dhe anëtarësimin në Këshillin e Evropës e në organizata të tjera ndërkombëtare.

“Të dy bashkëbiseduesit kanë diskutuar edhe për zhvillimet e fundit në rajon dhe situatën aktuale të sigurisë në Evropë. Presidentja Osmani ka thënë se Kosova vazhdon të jetë e përkushtuar për bashkëpunim dhe koordinim të ngushtë me Austrinë dhe aleatët e tjerë ndërkombëtarë për të kontribuar në mënyrë aktive për paqe dhe siguri të qëndrueshme”, thuhet në njoftimin e Presidencës.

“Presidentja shtoi se është me rëndësi që vendet demokratike të vazhdojnë t’i bashkërendojnë veprimet konkrete në mbrojtje të paqes dhe sigurisë dhe vlerave demokratike, duke theksuar nevojën që të mos tolerohen satelitët e Rusisë dhe tendencat e tyre destabilizuese në rajonin tonë”, thekson kumtesa.

Osmani ka ritheksuar angazhimin e institucioneve kosovare për dialogun me Serbinë, të përqendruar në njohje reciproke, si dhe në ruajtjen e sovranitetit, rendit kushtetues dhe funksionalitetit të Kosovës.

Siç bëhet e ditur në njoftim, presidentja Osmani po ashtu nënvizoi faktin se Kosova dhe Austria janë të bashkuara në qëndrimin ndaj luftës së paprovokuar të Rusisë në Ukrainë, dhe se njëkohësisht Kosova është 100% e bashkërenduar me BE-në në vendimet që lidhen me politikën e jashtme. /Zëri