ATK: Të hyrat tatimore arrijnë mbi 623 milionë euro

Trendi rritës i të hyrave në Administratën Tatimore të Kosovë vazhdon ta dominojë inkasimin edhe për periudhën janar-tetor 2022, ku përtej planit jemi për 12.9 milionë euro, ose 2,1%.

Përderisa, vlera totale e inkasimit shkon në 623.6 milionë euro tatime.

Ndërsa, sipas ATK-së, në krahasim me periudhën e njëjtë të vitit të kaluar kemi rritje për 111.1 milionë euro, ose 21.7%.

“Performanca e të hyrave vazhdon të jetë jashtëzakonisht e lartë, pavarësisht rishikimit të bërë të planit deri në fund vitit. Po ashtu, vlen të theksohet se kjo rritje ka ndodh pa pasur ndryshim të normave tatimore.

Vlerësim për rritje dyshifrore të të hyrave së fundi ATK ka marrë edhe nga raportet ndërkombëtare, si ai nga Komisioni Evropian dhe PEFA. Në këto raporte theksohet se progres i mirë është bërë gjatë periudhës raportuese në lidhje me mbledhjen e tatimeve, ku të ardhurat e përgjithshme për vitin fiskal 2021 ishin 19% më të larta se në vitin 2020 (të hyrat e përgjithshme, ATK & Doganë)”, ka njoftuar ATK-ja. /Zëri