Gërxhaliu thotë se në Kizhevak janë gjetur mbetje të shqiptarëve, nesër në konferencë për media tregohen detajet

Gërmimet njëjavore në gurorën “Kizhevak” të Serbisë, kanë rezultuar me dyshimet në gjetjen e mbetjeve mortore të katër personave.

Drejtori i Institutit të Mjekësisë Ligjore, Arsim Gërxhaliu tregon se profili gjenetik i tyre do të zbulohet para pranverës. Në këtë varrezë masive dyshohet të jenë varrosur 17 trupa të shqiptarëve civil nga lufta e fundit në Kosovë.

Por, gërmimet në Kizhevak do të përfundojnë gjatë së premtes për të rifilluar në pranverë për shkak të kushteve atmosferike. Me të përfunduar gërmimet në Kizhevak, destinacioni i radhës do të jetë në minierën tjetër të Shtavalit. Ky vend pritet të jetë varreza masive e gjashtë në Serbi, me trupa të civilëve shqiptarë. Nga katër lokacionet e para janë gjetur 941 trupa civilë, teksa shteti është në kërkim edhe të mbi 1600 trupave të tjerë, për fatin e të cilëve nuk dihet, shkruan TopChannel.

Ndërsa në një përgjigje për “Zërin”, Gërxhaliu ka thënë se kanë përfunduar gërmimet dhe se janë rrugës për në Kosovë. Ai tha se nesër do të dalin në konferencë për media në ora 11:00, e cila do të mbahet në Qeverinë e Kosovës për të treguar hollësisht për gjetjet mortore.

“Jemi rrugës për në Kosovë duke u kthyer e nesër dalim në një konferencë për media, në ora 11:00 në qeverinë”, tha ai.

Gërxhaliu thotë se në Kizhevak të Serbisë janë gjetur mbetje të shqiptarëve dhe se këto mbetje do të dërgohen në Komunitetin Ndërkombëtar për Personat e Pagjetur.

Ai ka bërë të ditur se në bazë të analizave do ta dihet për numrin e saktë të personave dhe lokacionin prej nga vijnë.

“Sot është përmbyllur lokacioni, janë gjetur mbetje të shqiptarëve, i kemi marrë masat ato tash dërgohen në Komunitetin Ndërkombëtar për Personat e Pagjetur dhe në bazë të analizave mund ta dimë numrin e saktë edhe lokacionin prej nga vijnë”, potencoi Gërxhaliu për “Zërin”.