Asnjëra prej marrëveshjeve në Bruksel nuk ka gjetur zbatim

Ndodhitë e fundit në veriun e Mitrovicës dhe mosimplementimi i marrëveshjeve të arritura mes Beogradit e Prishtinës zyrtare kanë dëshmuar se dialogu duhet të ndërpritet urgjentisht mes dy palëve në Bruksel.

Njohës të çështjeve politike në vend thonë se muri në Mitrovicë po rrit tensionet mes shqiptarëve dhe serbëve në Kosovë dhe se, sipas tyre, kjo situatë mund të jetë shkaktar i tensioneve potenciale.

Disa opozitarë thonë se zgjidhja e problemeve në Mitrovicë qëndron në largimin e ministres Tahiri apo në dorëheqjen e kryeministrit Mustafa, sipas të cilëve deri në një hap të tillë vazhdimi i bisedimeve Prishtinë – Beograd po shihet si i pakuptimtë.

Në Aleancën për Ardhmërinë e Kosovës (AAK) vlerësojnë se tashmë Qeveria duhet të vendosë cilën anë të mbajë. Deputetja e këtij subjekti, Time Kadriaj, deklaron se numri i marrëveshjeve të arritura në Bruksel është i madh, por asnjëra prej tyre nuk ka gjetur zbatim në praktikë.

“Janë shumë marrëveshje të arritura, por asnjëra s’po zbatohet nga autoritetet në Beograd.

Unë mendoj që me automatizëm të ndalen bisedimet sepse s’e ka asnjë kuptim vazhdimi i bisedimeve”, ka deklaruar Kadriaj.

Sipas saj, kryeministri i ka dy zgjedhje para tij, të shkarkojë ministren Tahiri apo të dorëzojë dorëheqjen e tij.

Se Mustafa duhet të japë përgjegjësi për murin në Mitrovicë mendojnë edhe në partinë opozitare “Nisma për Kosovën”. Deputetja e këtij subjekti, Valdete Bajrami-Dushica, vlerëson se veprimi i fundit i serbëve në veri tregon dështimin e qeverisë “Mustafa”.

“Ky dialog, të cilin e ka zhvilluar pala jonë me atë të Serbisë, është përfundimisht dialogu që shtetin serb e bëri faktor dhe ia mundësoi dhe lehtësoi rrugën drejt BE-së e ne nga ky dialog po fitojmë ndarjen e vendit, po fitojmë izolim të mëtutjeshëm e kjo gjithnjë falë punës së z. Mustafës, znj. Tahiri e edhe të tjerëve”, ka deklaruar Dushica.

Ajo duke folur për krijimin e Asociacionit të Komunave me Shumicë Serbe thekson se një veprim i tillë mund të bëhet vetëm me kompetencat ekzekutive.

“Ky Asociacion mund të krijohet vetëm me ligjet e shtetit tonë dhe assesi një asociacion me kompetenca ekzekutive. Gjykata Kushtetuese e ka dhënë një vendim në lidhje me këtë e që është se z. Mustafa kishte shkelur aktin më të lartë të shtetit në 23 nene”, ka deklaruar Dushica.

Sipas saj, me njerëz të tillë të cilët shkelin Kushtetutën e dështojnë në mbrojtjen e qytetarëve të vet Kosova nuk mund të shkojë përpara.

“Me këta shkelës të Kushtetutës, me këta njerëz të cilët nuk janë në gjendje t'i mbrojnë qytetarët, nuk janë në gjendje t'i mbrojnë interesat e shtetit nuk mundemi të ecim

tutje. Është koha urgjente kur vendi duhet të shkojë në zgjedhje të parakohshme sepse me të tillë njerëz nuk është larg mendjes të sillet Serbia prapë si pronare e Kosovës”, ka përfunduar ajo.

Analisti politik në vend, Imer Mushkolaj, vlerëson se pas ndodhive të fundit vazhdimi i bisedimeve me Serbinë është i pakuptimtë.

“Nuk ka kurrfarë kuptimi që bisedimet të vazhdojnë me idenë e përmirësimit të jetës së qytetarëve dhe lëvizjen e tyre të lirë e në anën tjetër të ngrihen mure, që janë e kundërta e këtyre vlerave”, ka thënë ai, duke theksuar se pala kosovare duhet ta rishqyrtojë pozicionin e saj në bisedime.

“Pala kosovare duhet ta rishqyrtojë pozicionin e vet në bisedime, pse jo edhe ta pezullojë pjesëmarrjen në to, përderisa të qartësohen shumë çështje që kanë të bëjnë me marrëveshjet e arritura”, ka deklaruar ai.

Sipas Imerit, përmes ndërtimit të murit Beogradi po synon krijimin e një agjende të re në bisedime. /ZERI/