Kurti: Lufta mund të nisë!

Deputeti i Lëvizjes “Vetëvendosje”, Albin Kurti, insiston se demarkacioni i kufirit me Malin e Zi, sipas Murat Mehës, është formulë e luftës. “Unë mendoj që demarkacioni i Murat Mehës bën konfliktin, luftën dhe gjakderdhjet e reja me Malin e Zi”.

Këto komente Kurti i ka bërë gjatë një interviste për gazetën “Zëri”, duke shtuar se personalisht është kundër luftës me Malin e Zi, por, siç thotë ai, lufta ndodh ku është kontesti kufitar e territorial.

“Mos harroni se në vitin 1998 në Kosovë ka pasur luftë, por në Prishtinë ka mundur të mos ketë. E mbaj mend shumë mirë se në Prishtinë ka pasur paqe, por në Drenicë, Dukagjin e Llap ka pasur luftë. Kur po them luftë, nuk po them se lufta vjen në Prishtinë, por ajo ndodh atje ku është kontesti kufitar e territorial”, ka theksuar Kurti.

Gjatë intervistës dhënë “Zërit”, e cila do të botohet në dy vazhdime, ish-kreu i Lëvizjes “Vetëvendosje” ka folur se a kanë qëndrim të prerë kundër islamit radikal, a po bëjnë kalkulime për vota, se pse shkuarja e 300 kosovarëve në ISIS, sipas tij, është problemi i tretë, e jo i pari për Kosovën etj.

Zëri: Që nga themelimi Lëvizja “Vetëvendosje” vazhdon të mbetet subjekt opozitar. Cili është kuptimi i funksionimit të kësaj partie nga ky pozicion? Nuk po arrini ta bëni elektoratin për vete, apo jeni peng i votës jointeligjente?

Kurti: Ne i kemi qëllimet shumë të mëdha, sepse synojmë ndryshime radikale në politikë dhe transformime shoqërore. Pra synimet e “Vetëvendosjes” nuk janë ngrohja e një supe në mikrovalë, por janë pjekja e një buke në furrë dhe rrjedhimisht jemi të vetëdijshëm se ato nuk mund të ndodhin aq shpejt sa dëshirojnë shumë mbështetës, simpatizantë e optimistë në Kosovë. Por sido që të jetë ne kemi parë një rritje të vazhdueshme, e cila posaçërisht në këto vitet e fundit ka qenë e formësuar me fitoren në Prishtinë, me largimin e mafies ndërtimore në kryeqytet dhe  në veçanti me zmbrapsjen e Qeverisë aktuale sa i përket dy projekteve të fqinjëve tanë, “Zajednicës” së Serbisë dhe demarkacionit me Malit të Zi. Pra unë jam i bindur se gjërat që marrin pak më shumë kohë janë gjithsesi edhe më të vërteta e edhe më të qëndrueshme.

Zëri: A jeni në gjendje të qëndroni në opozitë, apo mendoni se në zgjedhjet e ardhshme do të jeni pjesë e Qeverisë?

Kurti: Ne nuk e mendojmë vetveten, ne nuk e konceptojmë politikën mbi atë se a duhet të jemi në pozitë, apo në opozitë, por në besnikërinë tonë ndaj programit tonë politik, ndaj alternativës tonë qeverisëse dhe jemi të gatshëm të mos devijojmë dhe të mos lodhemi. Pra “Vetëvendosja” është një lëvizje e aktivistëve, të cilët as nuk devijojnë nga orientimi i tyre dhe as nuk lodhen nga gjatësia e ecjes sonë të përbashkët. Pra nuk e mendojmë politikën para së gjithash si çështje pushteti, por si konsolidim shteti, si progres shoqëror, si komb i realizuar e kështu me radhë.

Për shaminë, me fytyra të zbuluara

Zëri: Vazhdimisht e proklamoni se jeni një subjekt ndryshe, por çështja e votës nuk ka dëshmuar konsistencë. Nuk keni qëndrim të prerë për rrezikun nga islami radikal, ruajtjen e sekularitetit të shtetit dhe për çështjen e shamisë te të miturit. A është ky qëndrim taktik, apo nuk doni të pozicionoheni shkaku i votave?

Kurti: Qysh në gushtin e vitit 2012, Lëvizja “Vetëvendosje” i ka marrë qëndrimet e saj sa i përket temave që kanë dalë aso kohe, siç është puna e edukimit mbi fetë dhe bartja e shamisë në shkollat publike. Ne kemi thënë që jemi për një qasje liberale, në kuptimin e të drejtave dhe lirive themelore të njeriut, siç është edhe liria e besimit dhe praktikumit të besimit, konkretisht jemi kundër mësimit fetar në shkolla, por jemi kundër ndalimit të edukimit mbi fetë. Prej nesh këtë e morën edhe shumë të tjerë më vonë, përfshirë këtu edhe kryeministrin e Shqipërisë, Edi Rama. Ne nuk jemi as islamofilë e as islamofobë dhe qëndrim ynë është jashtëzakonisht parimor. As nuk e kemi maninë dhe as fobinë e religjioneve, jemi tolerantë dhe në të njëjtën kohë jemi për bashkëjetesë dhe bashkëveprim të religjioneve çfarë e ka karakterizuar gjithmonë kombin shqiptar. Sa i përket shamive, ne jemi që fytyra të jetë e zbuluar dhe në të njëjtën kohë kjo të vlejë për moshat mbi 16-vjeçare. Nuk po them asgjë të re. Tash dikush mund të na sulmojë se nuk po iu pëlqen qëndrimi ynë, mirëpo të thuhet se Lëvizja “Vetëvendosje” bën taktika ose se ka mungesë guximi, mendoj që është ose moskuptim i thellë ose dashakeqësi po aq e thellë.

Zëri: Janë mbi 300 kosovarë që kanë marrë pjesë në luftërat e huaja. Ju asnjëherë nuk e keni ngritur zërin si opozitë, ta zëmë siç e ka ngritur zërin partia e Ramush Haradinajt. Po ashtu ju nuk e keni përkrahur në Parlament Ligjin kundër Pjesëmarrjes në Luftëra të Huaja. A ka ndërlidhje kjo?

Kurti: Ky është moskuptim i thellë i qëndrimeve tona. Ne kemi thënë që organizatat e caktuara terroriste e ekstremiste, nga vetë Qeveria duhet të futen në një lisë të përpiluar, në mënyrë që ndihma ose pjesëmarrja në ato organizata të konsiderohet vepër penale. Ne kemi qenë për një qasje krejtësisht tjetër, prandaj edhe nuk e kemi mbështetur një ligj, i cili do ta ndëshkonte edhe Asim Vokshin e Xhemajl Kadën po të ishin gjallë, sepse kishin shkuar në Spanjë që ta luftojnë fashizmin e Frankos, e do ta ndëshkonte edhe një shqiptar i cili në një luftë siç ka ndodhur ajo në Preshevë e Maqedoni do t’i ndihmonte vëllezërit tanë atje. Pra ligji është vlerë normative, duhet të kesh parasysh situata të ndryshme para se ta shkruash ligjin e jo kur të jesh duke e zbatuar atë. Pra ne kemi pasur një qasje krejtësisht tjetër me të cilën jemi të bindur se do të arrinim rezultate shumë më të mira. “Al Kaida”, ISIS-i, “Al Nusra”, “Boko Haram”-i e shumë të tjera do të mundë të përfshiheshin në mesin e organizatave terroriste, ekstremiste mbase edhe disa organizata të Serbisë në Kosovë, siç është për shembull UDB-ja serbe. Dhe më pastaj nga një vendim i tillë qeveritar do të kishim një pozicion jashtëzakonisht të favorshëm për t’i luftuar edhe ato dukuri, por edhe ata persona. Pra ne kemi folur për këtë çështje, por sa flasim ne varet edhe sa na pyesin.

Zëri: Nuk e keni ngritur si shqetësim në konferencë për media, çështjen e shkuarjes së kosovarëve në Siri dhe Irak, siç i ngrini çështje tjera?

Kurti: Unë kam mbajtur fjalim në Kuvend për këtë gjë dy herë. Unë mendoj që shumë armiq të Republikës së Kosovës dëshirojnë ta paraqesin se Kosova është një vatër e përshtatshme, një tokë pjellore për islamin radikal dhe mendoj që si shtet duhet të jemi të kujdesshëm, duhet të tregojmë që Kosova nuk e ka këtë problem prioritar, Kosova e ka problem prioritar shovinizmin e Serbisë dhe korrupsionin institucional dhe vetëm më pas edhe ekstremizmit islamik apo të feve tjera. Pra nuk duhet të bëjmë gabim në hapa, duhet ta dimë qartë cila është hierarkia e problemeve në Kosovë. Por nuk duam ta luajmë lojën e djallit të sponsoruar nga Qeveria, e cila dëshiron që të merret vesh me Serbinë të harrohet korrupsioni dhe ta paraqesë islamin radikal si problemin numër një dhe të vetmin në Kosovë. Ne jemi kundër kësaj.

Islami radikal, problemi numër tre i Kosovës

Zëri: Problemi numër sa është ky?

Kurti: Është problemi numër tre.

Zëri: Pse nuk e keni ngritur ndonjëherë si çështje në konferenca?

Kurti: Nuk është e vërtetë që nuk e kemi ngritur. Çdoherë kur jemi pyetur jemi përgjigjur, çdoherë kur ka pasur debat në Parlament kemi folur dhe është dashakeqe ta akuzosh Lëvizjen “Vetëvendosje”.

Zëri: Në konferenca për media është fjala, pasi organizoni shpesh?

Kurti: Ne ngremë shumë çështje, por ngremë sikur që besojmë se është hierarkia e problemeve në Kosovë edhe Qeveria e ka këtë temë prioritare. Po e them edhe një herë, nuk e kam ndërmend ta luaj lojën e djallit të sponsoruar nga Qeveria.

Zëri: Elektorati e ka testuar qeverisjen e “Vetëvendosjes” në Prishtinë si një pilot-projekt nëse mund të themi. Vërehen ndalja e ndërtimeve pa leje dhe shtyllat kundër parkingjeve në trotuare, por nuk ka diçka tjetër me të cilën shquhet kjo qeverisje komunale?

Kurti: Nuk është e vërtetë. Është projekti me kifle, e cila është falas, është transparenca radikale.

Zëri: Por, ka shumë premtime që janë dhënë në fushatë e që nuk janë realizuar ende, ndërsa zgjedhjet lokale janë vitin e ardhshëm?

Kurti: Ne në Komunën e Prishtinës kemi arritur suksese më të mëdha edhe sa i përket shtrimit në infrastrukturë, edhe sa i përket cilësisë së shërbimeve publike më shumë se 13 vjetët paraprakë kur qeveriste LDK-ja dhe shkaktoi këtë kaos, këtë le të themi xhungël prej betoni në Prishtinë. Në Prishtinë edhe kanë mbjellë fidanë, edhe kanë zhvilluar zona publike, por në të njëjtën kohë Prishtina është vendi në të cilin mafia ndërtimore është ndalur. Nuk ka asnjë komunë tjetër në Republikën e Kosovës ku mafia ndërtimore është ndalur dhe nuk ka asnjë komunë tjetër ku mafia ndërtimore ka qenë aq e fuqishme sa në Prishtinë. Pra ky është një sukses i jashtëzakonshëm. Pra “Vetëvendosja” edhe e ka ndalur mafien ndërtimore në Prishtinë, po ashtu qysh po e ndal edhe “Zajednicën” dhe Demarkacionin. Nuk po them që jemi të vetmit që po e bëjmë, po na ndihmojnë edhe shumë qytetarë e opozitarë të tjerë. Ky është një sukses i jashtëzakonshëm për një subjekt si i yni.

Zëri: Së fundmi ndërtimet janë duke vazhduar me ritëm të njëjtë, ndoshta siç kanë qenë më herët?

Kurti: Jo me ritëm të njëjtë, nuk është e vërtetë, është shumë më pak. Ndërtimet e egra që kanë ekzistuar nuk janë më dhe është hapur zhvillimi i qytetit në zonat tjera ku nuk ka qenë më parë. Më herët nuk ka pasur ritëm, ka qenë kaos, tash ka ritëm sepse ka planifikim dhe zhvillim urban, ka ligj e rregulla, që nuk ka pasur më herët. Më herët ka qenë vullneti i përfituesve e tash është ligji që mbron ata të cilët janë më të dobët. Rregullat dhe ligji ekzistojnë aty për ta ndalur sundimtarin që t’i japë përparësi vullnetit të përgjithshëm.

Zëri: Procesi i demarkacionit ka nisur vite më parë, ndërsa opozita është kyçur në këtë çështje pak kohë para se të nënshkruhet marrëveshja, a keni mundur të veproni më herët?

Kurti: Nuk ka pasur transparencë. Ne nuk jemi në dijeni çka kanë biseduar, kur kanë biseduar dhe çfarë janë marrë vesh e çfarë vendimesh kanë sjellë. Por e dimë qartë një gjë, më 25 qershor të vitit 2015 ka pasur një rezolutë në Kuvendin e Kosovës që thotë se nuk duhet të bëhet nënshkrimi para se të debatohet në Kuvend dhe çfarë ndodh, ne i shohim në Vjenë më 26 gusht duke nënshkruar Hashim Thaçi dhe Skënder Hyseni pa ardhur marrëveshja në Kuvend, i cili asokohe ndodhej në pushim. Pra si mund të jesh vonë këtu kur ata nuk janë transparentë dhe nuk e dimë se çka po ndodh. Ai i dimë hollësitë e bisedimeve të zonjës Tahiri me Serbinë? E dimë çka po thotë ajo. E kemi një palë tjetër, e cila na informon se çfarë po merren vesh. Po i dimë pasojat, po e dimë se duhet t’i mbulojmë targat. Po i dimë pasojat, por nuk po i dimë premisat dhe as procesin e aq më pak hollësitë e tij. Mendoj që kemi korrur një fitore të jashtëzakonshme dhe mendoj që duhet përgëzuar qytetaria e shoqëria në Kosovë, opozita e posaçërisht Lëvizja “Vetëvendosje” për këtë ngadhënjim mbi Qeverinë, e cila nuk ishte as koalicion për vende pune, por koalicion për interesa të Serbisë dhe të Malit të Zi. Doli që është koalicion i “Zajednicës” dhe i Demarkacionit dhe u hasi “sharra në gozhdë”. Shumë mirë që u bë kështu dhe unë uroj që këta të na kujtohen si një ëndërr e keqe që nuk do të arrijë të bëhet realitet asnjëherë.

Zëri: Nëse demarkacioni është temë aktuale për më shumë se një vit, sa kohë do të na marrë Asociacioni në të ardhmen?

Kurti: Fajin e ka Qeveria pse e solli, ne kemi mundur të merremi me zhvillim ekonomik, me mirëqenie sociale, me arsimin, me shëndetësinë. Pse këta e bënë këtë, kanë premtuar 200 mijë vende të punës, 120 mijë vende të punës, mirëpo tërë kohën flasin për demarkacion dhe për “Zajednicë”. Pra, po flasin për diçka që nuk i kanë marrë votat në zgjedhjet e fundit. Këto dy tema i ka sjellë Qeveria dhe ne sigurisht që i rezistojmë dhe u bë shumë mirë që rezistenca jonë është e suksesshme. Na kanë marrë shumë kohë, nerva dhe energji, por fajin e ka Qeveria.

Zëri: A do të jetë temë kryesore sërish Asociacioni?

Kurti: Ka një mundësi që ai të mos na kthehet asnjëherë më. Unë uroj të jetë kështu dhe rrjedhimisht që të flasim për ekonominë.

Me kriteret e Mehës, Kosova vend pa kufi

Zëri: Kryetari i Kuvendit Kadri Veseli po thotë se do të bëhet Asociacioni dhe se do të votohet Demarkacioni, a ka garanci se do të kthehet?

Kurti: Ai ka thënë edhe më herët që do të bëhet kjo më 1 shtator. Ju e keni parë deklaratën edhe të Thaçit, edhe të Mustafës më 1 shtator se kjo punë është e kryer. Madje Thaçi qysh në qershor ka thënë se do të ratifikohet Demarkacioni brenda 10 ditëve. Unë mendoj se nuk duhet t’u besojmë njerëzve që vazhdimisht na gënjejnë. Me kriteret e Murat Mehës, të cilat i ka nënshkruar Thaçi dhe Hyseni, Kosova është një vend pa kufij. Demarkacioni i kufirit me Malin e Zi sipas Mehës, Mustafës, Thaçit e Hysenit nuk është demarkacion i kufirit ekzistues, por është kufi i ri. Me vetë faktin që është kufi i ri, kjo nënkupton që me logjikën e tyre që nuk ka kufi Kosova fare, por ne duhet t’i rrëmojmë librat kadastralë që t’i përcaktojmë kufijtë. Kjo nuk do të ndodhë. Në Kosova ka mjaftueshëm energji dhe dije që të mos lejohet një gjë e tillë dhe 1 shtatori është një dëshmi për këtë. Mos u besoni atyre, besoj që nuk kemi nevojë për gënjeshtrën e radhës për ta kuptuar që janë gënjeshtarë.

Zëri: Ju keni deklaruar se seanca e 1 shtatorit ka parandaluar një luftë, çfarë faktesh keni?

Kurti: Më datën 8 shtator kishte një shkrim në gazetën “Washington Post” që thoshte të njëjtën gjë, pse nuk e problematizuat? Aty thuhej që territori dhe kufiri i kontestuar sjell luftë të re dhe është fjala luftë në “Washington Post”. Pra këtu nuk është problemi çka është thënë, por kush e ka thënë. Problemi është që e thashë unë sepse kur e tha “Washington Post” nuk e problematizoi askush. Dy ditë e thashë unë, më 10 shtator dhe tash po problematizohet, interesante.

Zëri: Por kur “New Yrok Times” po thotë se Kosova është tokë pjellore e ekstremizmit, ju po thoni nuk është ashtu?

Kurti: Unë sigurisht që nuk i besoj “New York Times”-it, por besoj që ju i besoni “Uashington Post”-it. Pra çështja është se nuk kam thënë diçka të re sepse unë kam shumë vullnet për t’i mbrojtur qëndrimet e mia të reja ose idetë e mia të reja, ose shprehjet e mia të reja e kjo nuk është diçka e re. Sido që të jetë nëse ne, larg qoftë, do ta ratifikonim Demarkacionin me Malin e Zi me ato 8200 hektarë nuk e di a të nesërmen, a të pasnesërmen, a pas një jave, a pas një muaji Mali i Zi do ta sillte policinë dhe ushtrinë në atë pjesë dhe unë nuk mund ta imagjinoj që forcat policore e ushtarake të Malit të Zi ia mësyjnë kah Kuqishta dhe ndalen në Pellgun e Bjelluhës dhe situata vazhdon të jetë e qetë. Nuk është e mundshme për shkak se po e them edhe një herë, unë besoj në popull dhe në qytetarë. Nga bisedat që kam pasur me qytetarë, nga peticioni që e kemi mbledhur në popull, nga atmosfera që ekziston në bazë të sondazheve mbi 70% janë kundër demarkacionit me Malin e Zi e një pjesë e tyre të mashtruar se kjo na jep liberalizimin e vizave. Duhet ditur që kriteri kryesor është luftimi i krimit dhe korrupsionit, prandaj është e qartë se pse nuk na japin liberalizimin. Demarkacioni i kufirit sipas Mehës, Mustafës, Thaçit dhe Hysenit është formulë e luftës. Unë jam kundër luftës. Unë jam kundër luftës me Malin e Zi. Mos harroni që në vitin 1998 në Kosovë ka pasur luftë, por në Prishtinë ka mundur të mos ketë luftë. Unë e mbaj mend shumë mirë, në Prishtinë ka pasur paqe, por në Drenicë e në Dukagjin e në Llap ka pasur luftë. Kur unë po them luftë, nuk po them që lufta të vjen në Prishtinë, ajo ndodh atje ku është kontesti kufitar e territorial.

Zëri: Në bazë të kësaj që po thoni, nëse Demarkacioni kalon në ndonjërën nga seancat e radhës, atëherë do të ketë luftë?

Kurti: Unë mendoj që demarkacioni i Murat Mehës bën konfliktin, luftën dhe gjakderdhjet e reja me Malin e Zi.

Zëri: A janë të gatshëm për luftë aktivistët e “Vetëvendosjes” nëse kalon marrëveshja?

Kurti: Unë nuk mund të flas tash kush është i gatshëm për çka, kur e ku, por unë jam këtu që ta parandaloj luftën, unë refuzoj të diskutoj çka nëse ndodh, sepse nuk mund të jem aq shpirtkazmë që të flas tash për hollësitë e asaj lufte që u dashka të ndodhë meqë nuk mund të refuzohet demarkacioni i Murat Mehës. Unë jam për ta parandaluar një gjë të tillë me çdo kusht dhe me gjithë fuqinë e energjinë.

Zëri: Cili është komenti juaj për armët që u gjetën te disa aktivistë të “Vetëvendosjes”?

Kurti: Ato armë kanë qenë armë nga lufta dhe nuk kanë qenë armë të aktivistëve, por armë të baballarëve të tyre.

Në numrin e nesërm mund të lexoni:

• A ka ndryshuar qëndrimi i “Vetëvendosjes” ndaj ish-kryetarit të Gjykatës Kushtetuese, Enver Hasani, të cilin e akuzonte si gjyqtar të PDK-së? 
   
• A duhet të ekzistojë shteti i Kosovës?
   
• Pse nuk e urojnë Kosovën kur bën gara në arenën ndërkombëtare?
   
• A mendojnë se forcimi i identitetit shtetëror të Kosovës është goditje për Shqipërinë?
   
• A është Rexhep Selimi “i forti” i “Vetëvendosjes”?, etj.