Pamja e re e monumentit “Newborn” për 17-vjetorin e Pavarësisë së Kosovës
Aktuale
February 17, 2025 - 08:30
“Newborn”, simboli i shpalljes së Pavarësisë së Kosovës më 17 shkurt 2008, ka marrë një pamje të re për 17-vjetorin e Pavarësisë së Kosovës.
Për çdo vit ky monument reflekton mesazhe të ndryshme dhe ngjarje të rëndësishme për vendin.
“Newborn” për Ditën e Pavarësisë së Kosovës vjen me një koncept që pasqyron zhvillimin e Inteligjencës Artificiale.
Ideatori i këtij monumenti, Fisnik Ismaili, tha se ka synuar ta bashkojë punën e njeriut me AI, duke reflektuar ndikimin që ka inteligjenca artificiale në jetët tona të përditshme.
“Sivjet NEWBORN i dedikohet AI, por për me e ngjyrosë, hala na duhet dora edhe shpirti i njeriut”, ka shkruar ai.
Projekti deri më tani është vlerësuar me një numër çmimesh prestigjioze të dizajnit në të gjithë botën.
