Stacioni “Qendra” i Policisë mbeti pa rrymë, dyshohet që është djegur transformatori
Në stacionin Qendra të Policisë së Kosovës në kryeqytet mbrëmë pas mesnate është ndalur energjia elektrike për më shumë se një orë.
KEDS-i po thotë se dyshohet që është djegur transformatori i Policisë për të cilin nuk kanë përgjegjësi. Në ndërkohë, monitorues të sigurisë konsiderojnë se raste të tilla janë shqetësuese.
Në orët e para të mëngjesit të së premtes, stacioni kryesor i policisë në kryeqytet, i njohur si Qendra ka qenë në terr.
Burime brenda Policisë i thanë televizionit se stacioni nuk ka pasur energji elektrike për më shumë se një orë.
Arsye për këtë ka, por KEDS-i po thotë se kjo nuk ka ndodhur me fajin e tyre.
“Transformatori që furnizon Stacionin e Policisë është pronë private e tyre. Ky transformator dyshohet se është djegur, por ai është aset i tyre dhe nuk i përket KEDS-it, për çka ju lus që t’u drejtoheni atyre”, kanë thënë nga KEDS.
Por gjatë ditës, zyra për media e Policisë së Kosovës nuk u përgjigjën në interesimin e televizionit për të kuptuar se çka kishte ndodhur saktësisht.
Ish-zv.Ministri i Punëve të Brendshme, Valdet Hoxha po thotë se ajo çfarë ka ndodhur është shqetësuese.
“Nderprerja e energjise elektrike ne stacione policore eshte nje sfide e madhe dhe ndikon ne uljen efikasitetin dhe efektivitetit, shkakton nderprerjen e veprimtarise normale te punes qe eshte kruciale per ofrimin e sherbimeve ne mbrojtje te jetes dhe prones se qytetareve”, ka thënë Hoxha.
Stacioni “Qendra” është një prej 8 stacioneve policore të Drejtorisë Rajonale të Policisë së Kosovës në Prishtinë. /dukagjini
