Ministria e Financave dhe KEK-u me marrëveshje mbi 60 milionë euroshe për projekte të energjisë solare

Ministri i Financave, Punës dhe Transfereve Hekuran Murati dhe kryeshefi ekzekutiv i Korporatës Energjetike të Kosovës (KEK), Bekir Gërguri, kanë nënshkruar dy marrëveshje me vlerë totale mbi 60 milionë euro për financimin e projektit të energjisë solare I (Solar4Kosovo).

“Ky projekt parasheh ndërtimin e një impianti fotovoltaik diellor me kapacitet të instaluar deri në 100 MW, që do të prodhojë rreth 152 GWh energji në vit. Synimi kryesor është rritja e prodhimit të energjisë nga burimet e ripërtëritshme dhe ulja e ndikimit në ambient nga prodhimi i energjisë elektrike në Kosovë”, thuhet në njoftimin nga Ministria e Financave.

Pjesë e projektit është instalimi i paneleve solare në fushat e ish-deponisë së hirit të KEK-ut, afër termocentraleve.

“Para instalimit, rreth 150 hektarë të ish-deponisë së hirit në afërsi të ‘Kosova A’ dhe deponisë së hirit ‘Dragodan’ do të rivitalizohen. Përveç kapacitetit të shtuar për prodhimin e energjisë elektrike, ky projekt do të ndihmojë KEK-un në rritjen e nivelit të menaxhimit të burimeve të energjisë, si dhe në zhvillimin e kapaciteteve për investime në burime të diversifikuara të energjisë në të ardhmen”, thuhet në njoftim. /Zëri