AAK-ja pas mbledhjes së Kryesisë: Kosova t'u rikthehet aleatëve

Kryesia e Aleancës për Ardhmërinë e Kosovës (AAK), të enjten ka zhvilluar një mbledhje të kryesisë.

Pas kësaj mbledhje, zyra për media e kësaj partie opozitare ka dërguar një komunikatë.

Aty thuhet ndër tjerash se Kosova duhet të ju rikthehet aleatëve.

”Dhe e vërteta e jonë është paqëndrueshme pa anëtarësimin e Kosovës në NATO, e kjo nuk bëhet pa aleatët strategjikë, Amerikën dhe demokracitë tjera perëndimore. Ata që sot provojnë të ecin përpara duke mos e përfillur aleatin kryesor të lirisë dhe pavarësisë së Kosovës, Amerikën, nuk janë të vërtetët. Prandaj Kosova duhet të kthehet në kursin e vet të vërtetë e t’u kthehet aleatëve të vet”, thuhet ndër tjerash në komunikatë.

Po ashtu, për çështje të brendshme AAK-ja përmendi tri shtylla, rend dhe ligj, luftë kundër korrupsionit dhe zhvillim ekonomik.

Komunikata e plotë:

Ajo mund të mbijetojë, të forcohet e të prosperojë vetëm me njerëz të vërtetë. Eksperimentet me platforma e ide, pa të vërtetën dhe pa njerëzit e vërtetë, vetëm sa e zgjasin agoninë tonë.

Dhe e vërteta për Kosovën sot është përfshirja e njerëzve të vërtetë në vendimmarrje për vendin.

Kosova ka mbërritur këtu ku është sot, vetëm falë njërëzve të vërtetë, në të gjitha fazat e një lufte shekullore, deri në lirinë e plotë dhe në krijimin e shtetit.

Dhe e vërteta e jonë është paqëndrueshme pa anëtarësimin e Kosovës në NATO, e kjo nuk bëhet pa aleatët strategjikë, Amerikën dhe demokracitë tjera perëndimore.

Ata që sot provojnë të ecin përpara duke mos e përfillur aleatin kryesor të lirisë dhe pavarësisë së Kosovës, Amerikën, nuk janë të vërtetët.

Prandaj Kosova duhet të kthehet në kursin e vet të vërtetë e t’u kthehet aleatëve të vet.

Ata që e zvarrisin marrëveshjen përfundimtare për njohje me Serbinë, me lloj-lloj marifetesh e justfikimesh, e me zgjidhje qesharake për veriun e vendit, e kanë me hile. Ata i janë futur një misioni të pamundshëm, rikthimin e Kosovës në pikën zero.

Është detyrë e secilit prej nesh, që qysh sot të zhbllokohet gjendja e krijuar në veri dhe të përmbyllet kapitulli i marrëveshjes finale me Serbinë dhe kjo nuk mund të bëhet me njerëzit që nuk janë të vërtetët.

Në planin e brendshëm e vërteta jonë mbështetet në tri shtylla:

• Rend dhe ligj e pa sulme të pushtetit ndaj sistemit të drejtësisë dhe mediave;

• Luftë kundër korrupsionit e informalitetit, që nënkupton shkëputje të lidhjeve të shkurtëra korruptive, depolitizim të administratës e të bordeve;

• Zhvillim ekonomik e sektorial që nënkupton zhbllokimin e mjeteve financiare dhe rikthimin e tyre në projektet zhvillimore, heqjen e pengesave për investime të huaja, mbështetjen e bizneseve vendore e jo anatemimin e tyre si dhe politika të qëndrueshme në sektorë veç e veç.

Vendi sot ka nevojë për të vërtetën e vet dhe pa e kuptuar të vërtetën nuk do të mund të lëvizim nga vendi. Nuk bëjmë përpara dhe do të ngecim aty ku kemi ngecur tash e tri vjet.

Asnjë synim politik, diplomatik, ekonomik apo fundja edhe nacional, nuk do të mund ta realizojmë pa njerëz të vërtetë.