“Në Kumanovë u nënshkrua kapitullimi i Serbisë”, Kurti flet për idenë e Borrellit që takimi të mbahet në Maqedoni

Kryeministri Albin Kurti ka përmendur disa elemente simbolike, për të cilat mendon se janë arsyet që shefi i BE-së për politikë të jashtme, Josep Borrell, zgjodhi Maqedoninë e Veriut, për takimin e ardhshëm të nivelit të lartë në dialogun Kosovë-Serbi.

Sipas Kurtit, është Kumanova njëra ndër vendet historike, ku u nënshkrua kapitullimi i Jugosllavisë së Millosheviqit, si njëra ndër specifikat kryesore që Borrelli ka bërë zgjedhjen e tij, njofton klankosova.

“Të mos të harrojmë që më 9 qershor të vitit 1999 në Kumanovë ishte nënshkruar kapitullimi i Jugosllavisë së Millosheviqit dhe së hyrjes së forcave të NATO-s në Kosovë, mendoj që këto elemente simbolike kanë qenë të rëndësishme për Josep Borrellin që të na ftojnë këtu për takimin e radhës të nivelit të lartë”.

Megjithatë, ai nuk pati vetëm këtë shpjegim.

”Shkupi është qyteti i madh më i afërt me Prishtinën, po ashtu mendoj që ka impakt të madh në rajonin në kuptim që Maqedonia e Veriut është një vend i cili avancon në kontekst të demokracisë, sundimit të ligjit dhe në kontekst të integrimeve evropiane. Republika e Kosovës zë vendin e 84 nga 180 vende dhe Maqedonia është në vendin e 85 për sundimin e ligjit. Në këtë kuptim jemi kampionë për më të mirët”.

Këto deklarata kryeministri Albin Kurti i dha gjatë pjesëmarrjes së tij në Forumin Ekonomik në Shkup.