Samiti i BE-së në Tiranë, Xhaçka thotë se pritshmëritë janë të dyfishta

Nga Bukureshti, ministrja Olta Xhaçka është pyetur nga mediat për Samitin BE - Ballkan Perëndimor që mbahet në Tiranë më 6 dhjetor. Siç raporton Zyra për Shtyp e ministres, ajo u shpreh se mbajtja e Samitit në Tiranë flet për ndryshime madhore gjeopolitike të BE-së.

Sipas Xhaçkës, pritshmëritë për samitin janë të dyfishta. Së pari, riafirmimi i një angazhimi të plotë për perspektivën e anëtarësimit të BP-së në BE. Së dyti, forcimi i bashkëpunimit midis dy rajoneve në fusha si siguria dhe politika e jashtme. Sipas Ministres, ky samit është një mundësi e mirë për t’iu treguar udhëheqësve të vendeve pjesëmarrëse mikpritjen shqiptare në mënyrën e duhur.

“Fakti që Samiti BE-Ballkan Perëndimor do të mbahet në Tiranë, në rajonin e Ballkanit Perëndimor, flet për një sërë ndryshimesh madhore në kuptimin gjeopolitik të BE-së drejt një imperativi për një vëmendje të qëndrueshme gjeostrategjike të BE-së për rajonin e Ballkanit Perëndimor, Evropën Juglindore, veçanërisht në kontekstin e shumëfishtë të sigurisë që ka krijuar lufta e Rusisë kundër Ukrainës”.

“Unë do të thosha se pritshmëritë për samitin janë të dyfishta: së pari riafirmimi i një angazhimi të plotë dhe të qartë për perspektivën e anëtarësimit në Bashkimin Evropian për të gjitha vendet e Ballkanit Perëndimor dhe përshpejtimi i hapave pozitivë në të gjitha proceset përkatëse integruese evropiane të vendeve të rajonit, veçanërisht pas Konferencave të para Ndërqeveritare për Shqipërinë dhe Maqedoninë e Veriut në korrik 2022. Së dyti, Samiti duhet të shërbejë si një mundësi ku bollëku i një morie angazhimesh midis dy rajoneve vjen në fuqi, nga siguria tek çështjet e politikës së jashtme, tek sundimi i ligjit, tregu i brendshëm dhe bashkëpunimi në sektorë të veçantë si: energjia, transporti, punët e brendshme, digjitalizimi etj.

Një angazhim më i thellë, hap pas hapi, në të gjithë këta sektorë, do të krijojë standardet e dëshirueshme që Ballkani Perëndimor të jetë në gjendje të përfitojë nga mënyra e përshpejtuar e integrimit sektorial përpara se të bëhen anëtarë të plotë të BE-së. E fundit, por jo më pak e rëndësishme; do të jetë një mundësi e mirë për t’u treguar udhëheqësve të vendeve pjesëmarrëse mikpritjen shqiptare në mënyrën e duhur!”. /tvklan.al